Qyzylorda qalasynda turatyn meiirger Gúlsim Dosaeva meditsina salasynda otyz jyldan astam ýaqyttan beri qyzmet atqaryp keledi. Ol ózine qarasty aýmaqtaǵy turǵyndardyń árbiriniń meken-jaiyn jaqta biledi, dep habarlaidy QazAqparat.
Búginde №3 qalalyq emhananyń meiirger qyzmetin atqaratyn Gúlsim Dosaeva Qarmaqshy aýdanynyń Aqjar aýylynda 1966 jyly dúniege kelgen. Bala kezinen dáriger bolýdy armandaǵan ol 1983 jyly Qyzylorda meditsinalyq kolledjine oqýǵa túsip, ony feldsher mamandyǵy boiynsha oidaǵydai aiaqtady.
Alǵash eńbek jolyn meditsinalyq bekette meiirbike bolyp bastaǵan Gúlsim 1991 jyldan bastap №1 qalalyq emhanada qyzmetin jalǵastyrdy. Atalǵan emhanada 20 jyldan astam ýaqyt boiy halyqqa qyzmet kórsetip, kóptiń alǵysyna bólenedi.
«Meditsina salasy qashanda úlken jaýapkershilikti talap etetini belgili. Biz muny eshqashan esten shyǵarǵan emespiz. Aldymyzǵa kelgen árbir naýqastyń dertinen jazylyp shyǵýyna qol ushyn sozamyz. Osylaisha eldiń alǵysyna bólenip jatatyn kezimiz az emes», - dedi meiirbike Gúlsim.
Meiirger 10 myńǵa tarta turǵynǵa qyzmet kórsetken ol óz isiniń naǵyz maitalman mamany. Turǵyndardy týysyndai jaqyn tutyp, árbiriniń jeke basyn anyqtaityn málimetterin jinaqtaidy. Olardyń árbiriniń meken-jaiyn jatqa biletin meiirbike jumysyna degen jaýapkershilikti bárinen biik qoiady.
Tájiribeli maman 2012 jyly №3 qalalyq emhanaǵa nefrolog meiirbikesi bolyp jumysqa aýysty. Munda da ol turǵyndardan tek rizashylyq alyp keledi. Onyń naýqastardy emdeýde, aýrýynan aiyqtyrý jolyndaǵy eńbegi aitarlyqtai zor.
«Naýqastarǵa kómektesýdi árdaiym aldyńǵy kezekke qoiamyn. Olardyń sapaly em alýyn tikelei qadaǵalaimyn. Osylaisha árbir adamnyń saýyǵyp ketýine janashyrlyqpen qaraimyn», - deidi ol.
