2020 jylǵy 1 shildede Qazaqstanda «Jas otbasy» jańa turǵyn úi baǵdarlamasy iske qosyldy. Bul týraly PrimeMinister.kz-ke bergen suhbatynda «Qazaqstannyń turǵyn úi qurylys jinaq banki» AQ basqarma tóraiymy Lázzat Ibragimova aityp berdi.
«Qurylǵanyna úsh jyl tolmaǵan jas otbasylar depozit ashyp, birden turǵyn úi qunynyń 50%-yn sala alady, sonda ipoteka tómendetilgen mólsherlememen resimdeledi. Bizde negizinen 8,5%, al jas otbasylar úshin arnaiy 6% belgiledik. Suranys óte joǵary, bir aida 1,5 myńǵa jýyq depozit ashyldy», — dep habarlady L. Ibragimova.
Onyń aitýynsha, qazir jas otbasynyń jasyn 3 jastan 5 jasqa deiin arttyrý máselesi qarastyrylyp jatyr.
«Qazir kóptegen otbasylar: “Nege 3 jyl? 5 jyl da jas otbasy úshin uzaq ýaqyt emes. Bizdi de qoldańyzdar” dep jazyp jatyr. Biz bul usynystardy qarastyramyz. Sondyqtan biz úshin Otbasy bank transformatsiiasy tek qaǵaz júzinde ǵana emes, is júzinde oryndalǵany óte mańyzdy. Biz barlyq otbasylar úshin mamandyqqa, áleýmettik mártebege qaramastan, teń qoljetimdi bolǵanyn qalaimyz», — dedi ol.
Tabysy tómen árbir otbasy tómen mólsherlememen ipoteka alýǵa úmitker bolýy qajet.
«Osy qaǵidalardy engizemiz, biz jyl sońyna deiin Indýstriia jáne infraqurylymdyq damý ministrligimen birge, Úkimettiń qoldaýymen zańnamalyq bastamalardyń úlken toptamasyn iske asyryp, qoǵamǵa túsindiretin bolamyz, sodan keiin tolyq daiyn bolǵanda jáne Otbasy bankiniń atalǵan joǵary statýsyna sai bolǵan sátte biz qaita ataý protsesin qolǵa alamyz», — dep atap ótti L. Ibragimova.
Jyljymaityn múlik naryǵyna keler bolsaq, bul qoǵamda kóp talqylanyp jatqan ózekti másele.
«Karantinnen keiin biz barlyq ipotekaǵa degen qyzyǵýshylyqtyń artqanyn baiqadyq. Maýsym aiynda biz 5 myńnan astam qaryz berdik. Bul naýryz, sáýir jáne mamyrdan bastap keiinge qaldyrylǵan suranys. Shilde aiynda da suranys asa joǵary boldy. Biz sondai-aq “Baqytty otbasy”, “Áskeri baspana” baǵdarlamalaryn iske asyryp jatyrmyz, “5-10-20” ótinimderin qaraýdy tolyqtai tamyz aiynan bastaimyz. Aita keterligi, elitalyq turǵyn úi naryǵynda baǵanyń tómendeýi baiqalady, óitkeni óte úlken qymbat páterlerge degen suranys tómen. Meniń oiymsha, qaitalama turǵyn úi naryǵynda baǵa tómendeýi múmkin, óitkeni onda bári satý jyldamdyǵyna bailanysty, iaǵni, eger siz qymbat baǵaǵa satqyńyz kelse, onda siz uzaq ýaqyt júrip qalasyz», — dep túsindirdi L. Ibragimova.
Onyń aitýynsha, búgingi tańda Qazaqstanda jyljymaityn múlik baǵasynyń ósýine yqpal etetin eshqandai faktorlar joq. Sonymen qatar uzaq merzimdi perspektivada suranys joǵary bolady, óitkeni jastar sany ósýde.
