2021 jylǵy 1 sáýirden bastap tańbalanýy mindetti temeki ónimderiniń tizimi uzartylady. Bul týraly tolyǵyraq QR Qarjy ministrligi Memlekettik kirister komitetiniń memlekettik qyzmetterdi kórsetý departamentiniń direktory Baqytgúl Qazaqbaeva aityp berdi, dep habarlaidy QazAqparat.
«Qarjy ministrligi tsifrlandyrý sheńberinde kóleńkeli ekonomikanyń úlesin azaitýǵa baǵyttalǵan birqatar sharany qolǵa alǵan edi. Bul rette taýarlardy tańbalaý júiesi - mańyzdy baǵyttardyń biri. Qazaqstanda taýarlardy tańbalaý tártibi mindetti. Ony engizý protsesi barysyna óndirýshi, importer, distribiýtor men bólshektik saýda ókili qatysady. Taýardy tańbalaý eki kezeń boiynsha júrgiziledi: birinshisine 2020 jylǵy 1 qazannan bastap óttik. Ol boiynsha filtrsiz jáne filtrli temekiler tańbalanady. 2021 jylǵy 1 sáýirden bastap biz tańbalaýdyń ekinshi kezeńine ótemiz. Ol jerde sigaretterdi, sigarillalardy, elektrondy temekilerge arnalǵan suiyqtyqtar jáne osyǵan qatysty taǵy basqa taýarlar da tańbalaýǵa jatqyzylady», - dedi Baqytgúl Qazaqbaeva Ortalyq kommýnikatsiialar qyzmeti alańynda ótken baspasóz máslihatynda.
Onyń aitýynsha temeki ónimderi legin tańbalaý arqyly zańsyz taýar ailanymyn qysqartýǵa bolady. Birinshiden, tutynýshylar úshin bul tártip ónimniń qaýipsizdigine kepildik berse, óndirýshiler men kásipkerler úshin zańdy básekeli ortany qalyptastyrady. Osylaisha salyqtan túsken qarajattyń esebinen biýdjetke túsetin kiris kólemi de ulǵaiady.
«Endi tsifrlyq tańba týraly aita keteiin. Data matrix, iaǵni tsifrly tańba qaǵaz júzindegi aktsizdi tańbanyń ornyn almastyrady. Óndirýshiler men importerler temekiniń árbir qorabyna Data matrix kodyn engizedi. Ol kodta óndirýshiler týraly málimet, seriialyq nómiri men tekserýshi kody belgilengen. Dúkender temekini satqan kezde kassir Data matrix-ti skanerlep, temekiniń satylǵany týraly aqparat OFD-ǵa jóneltiledi. OFD-dan aqparat taýarlardyń tańbalanýyn baqylaityn aqparattyq júiege jóneltiledi», - dedi ol.
