Qazaqstanda bastaýysh synyp oqýshylaryn baǵalaý júiesi ózgeredi. 2026 jylǵy 1 qyrkúiekten bastap 2-4 synyp oqýshylary jańartylǵan tártip boiynsha baǵalanady, dep habarlaidy ult.kz.
Bul týraly Ortalyq kommýnikatsiialar qyzmetinde ótken brifingte Oqý-aǵartý birinshi vitse-ministri Shynar Aqparova málimdedi.
Ministrlik bul ózgeristerdi ata-analardyń ótinishteri, pedagogterdiń usynystary men tájiribesi, oqýshylardyń oqý jetistikterin monitoringteý nátijeleri jáne otandyq ári halyqaralyq zertteýlerdiń qorytyndylary negizinde engizip otyr.
Bul rette kriterialdy baǵalaý júiesi saqtalady.
Birinshi synyp oqýshylaryna burynǵydai baǵa qoiylmaidy. Al 2-4 synyptarda formativtik baǵalaý saqtalyp, onyń toqsandyq baǵadaǵy úlesi artady. Ol burynǵydai 1-den 10 balǵa deiingi shkala boiynsha júrgiziledi, biraq ball qoiý tártibi naqtylanady.
Aralyq baǵalaý engiziledi
Jańa júiede oqý bólimderin meńgerý deńgeiin anyqtaý úshin aralyq baǵalaý engiziledi.
Formativtik baǵalaý oqýshynyń kúndelikti oqý barysyndaǵy jetistigin kórsetse, aralyq baǵalaý belgili bir oqý bólimi aiaqtalǵannan keiin meńgerilgen bilim men daǵdylardy qorytyndylaýǵa múmkindik beredi.
Osyǵan bailanysty toqsan sońynda bólek TJB ótkizilmeidi. Oqý bólimderiniń nátijesi aralyq baǵalaý arqyly anyqtalady. Sondai-aq toqsan sońynda buǵan deiin baǵalanǵan bólimderdiń barlyǵyn qamtityn jeke jiyntyq jumys júrgizilmeidi.
Nátijesinde toqsan ishindegi baǵalaý jumystarynyń sany bir jumysqa qysqarady. Ministrlik bul oqýshylardyń baǵalaý júktemesin azaityp, muǵalimderdiń TJB tapsyrmalaryn ázirleý, ótkizý jáne tekserýge jumsaityn ýaqytyn qysqartatynyn atap ótti.
Aralyq baǵalaýdyń formaty da ózgeredi. Onyń negizgi túrleriniń biri retinde diktant, baqylaý jumysy, shyǵarma jáne mazmundama siiaqty jazbasha jumystar qarastyrylady.
Olardy oryndaýǵa oqýshylarǵa tolyq 45 minýttyq sabaq ýaqyty beriledi.
