Foto: dknews.kz
Memleket basshysy "Ana Tili" gazetine suhbat berip, halyqty tolǵandyrǵan suraqtarǵa jaýap berdi. Qasym-Jomart Toqaev ýaqyt beldeýi máselesine qatysty da pikir bildirdi. Prezident bul másele tóńiregindegi talqylaýlardan habardar ekenin, úkimet pen parlament bul máseleni qarastyryp, birigip negizdelgen sheshim qabyldaitynyna senim bildirdi.
"Úkimet óz sheshiminiń oryndy ekenine senimdi jáne Qazaqstan bir ýaqyt beldeýinde bolýy qajet dep sanaidy. Ýaqytty durys paidalaný týraly Barselona deklaratsiiasynda ártúrli ýaqyt beldeýin engizýge, ony qysqy jáne jazǵy ýaqytqa aýystyrýǵa áýes bolmaý qajettigi aitylǵan. Degenmen azamattarymyz ótinish bildirip jatyr. Úkimettiń sheshimine qatysty ashyq talqylaýlar jandana tústi. Menińshe, qoǵamda kózqaras qaishylyǵyn týdyratyn mundai máselelerdi muqiiat talqylaý qajet", – dedi Toqaev.
Memleket basshysy aldaǵy ýaqytta naqty usynystar talqylanatynyn málimdedi.
"Parlamentte ǵalymdardyń, sarapshylardyń jáne aimaq ókilderiniń qatysýymen qoǵamdyq tyńdaý ótti. Taraptar ýaqyt beldeýin aýystyrýdyń el ekonomikasyna jáne azamattardyń turmysyna áseri jónindegi barlyq pikirdi eskere otyryp, 1 naýryzǵa deiin jan-jaqty zertteý júrgizýge ýaǵdalasty. Sodan keiin naqty usynystar ázirlenedi. Parlament pen Úkimet bul máseleni baiyppen zerdelep, ortaq ári durys sheshimge keletinine senimdimin", – dedi Toqaev.
Eske salaiyq, buǵan deiin 19 qarashada premer-ministr Oljas Bektenov Qazaqstanda biryńǵai ýaqyt beldeýin engizý týraly sheshimdi úkimettiń qoldaǵanyn málimdedi.
Jýyrda Qazaqtandaǵy ǵylymi qoǵamdastyq usynystar men sheshimder usynǵan bolatyn.
