42 500 teńge alýǵa birneshe ótinish jazǵandar bar. Bul týraly Ortalyq kommýnikatsiialar qyzmetinde ótken onlain brifingte aityldy, dep habarlaidy QazAqparat.
«Búgingi tańda 938 myń adamnan 1 284 000 ótinish tústi. Demek, bir adam birneshe ret ótinish berip otyr. Múmkin qatelesip, jańylysyp jibergen bolarsyzdar. Biraq «2-3 ret ótinish bersem, 42 500 teńgeni 2-3 ret alam» dep oilasańyz – qatelesesiz. Aqparattyq júie onyń bárin tekserip, rettep alady», - deidi QR Eńbek jáne halyqty áleýmettik qorǵaý ministri Birjan Nurymbetov.
Ol ótinish bergen adam tótenshe jaǵdaiǵa bailanysty tabysynan aiyrylǵanyn rastaitynyn aitty.
«Ótinish bergen kezde portaldyń astyńǵy jaǵynda «Men jumys istep júrip, tótenshe jaǵdaiǵa qatysty tabysymnan aiyrylǵanymdy rastaimyn jáne ózime jaýapkershilikti alamyn» degen sóz bar. Siz ol joldardy oqydyńyz, al biz sizge sendik degendi bildiredi. Muny ne úshin aityp otyrmyz? Bul tólemdi soǵan muqtaj adamdar alsa degen nietimiz bar. Juma, senbi kúnderi alǵashqy 412 myń adamnan ótinish qabyldaǵan kezde biz tekseris jasap kórdik. 1873 adam ótinish bergen, biraq aqparattyq júie arqyly tekserip edik, olar qańtar, aqpan, naýryz ailarynda orta eseppen 500 myń -1 mln teńgeden astam tabys alǵan azamattar ekeni anyqtaldy. Bul – durys emes, sizderge 42 500 teńge tólenbeidi», - deidi ol.
