«Қазгидромет» РМК еліміздің бірнеше өңіріне қатысты дауылды ескерту жариялап, алдағы күндері қатты ыстық, найзағай, бұршақ және екпінді жел күтілетінін мәлімдеді, деп хабарлайды ult.kz.
Синоптиктердің болжамынша, 22-30 маусым аралығында Қазақстанның орталық, шығыс және оңтүстік-шығыс өңірлерінде аптап ыстық сақталады. Ұлытау, Қарағанды, Ақмола, Павлодар, Абай, Шығыс Қазақстан, Алматы және Жетісу облыстарында ауа температурасы күндіз 30-38 градусқа дейін көтеріледі.
Ал Қарағанды, Павлодар және Алматы облыстарының жекелеген аудандарында сынап бағаны 40-41 градусқа дейін жетіп, өте қатты ыстық болады деп күтілуде.
Мамандар мұндай жоғары температураға байланысты аталған өңірлердің басым бөлігінде жоғары және төтенше өрт қаупі сақталатынын ескертті.
Найзағай, бұршақ және дауыл күтіледі
24 маусымда еліміздің көптеген облыстарында ауа райының күрт құбылуы болжанып отыр. Астана қаласында жаңбыр жауып, найзағай ойнайды, күндіз бұршақ түсіп, дауыл болуы мүмкін. Желдің екпіні 15-20 м/с-қа дейін жетеді.
Сондай-ақ Ақмола, Солтүстік Қазақстан, Павлодар, Қарағанды, Абай және Шығыс Қазақстан облыстарында жаңбыр, найзағай, бұршақ және дауыл күтіледі. Кей жерлерде қатты жаңбыр жауып, желдің жылдамдығы 23-28 м/с-қа дейін күшеюі ықтимал.
Алматы, Жетісу, Жамбыл және Түркістан облыстарында да өткінші жаңбыр мен найзағай болжанған. Таулы және тау бөктеріндегі аудандарда жел күшейіп, кей өңірлерде дауыл болуы мүмкін.
Шаңды дауыл болатын өңірлер
Солтүстік Қазақстан, Павлодар, Абай және Маңғыстау облыстарының жекелеген аудандарында шаңды дауыл күтіледі. Бұл уақытта тұрғындарға алыс жолға шыққанда сақтық шараларын сақтау ұсынылады.
Қызылорда облысында желдің екпіні 15-20 м/с-қа дейін күшейсе, Ақтөбе, Атырау, Батыс Қазақстан және Қостанай облыстарында жаңбыр мен найзағай болжанып отыр.
Тұрғындарға ескерту
Төтенше жағдайлар қызметі азаматтарды ауа райының қолайсыз құбылыстары кезінде қауіпсіздік талаптарын сақтауға шақырады. Аптап ыстық күндері күннің астында ұзақ жүрмеу, көп мөлшерде су ішу және өрт қауіпсіздігі ережелерін қатаң сақтау қажет.
Ал найзағай, бұршақ және қатты жел кезінде ашық алаңдарда болмауға, ағаштар мен электр желілерінің маңынан аулақ жүруге кеңес беріледі.
