«Qazgidromet» RMK elimizdiń birneshe óńirine qatysty daýyldy eskertý jariialap, aldaǵy kúnderi qatty ystyq, naizaǵai, burshaq jáne ekpindi jel kútiletinin málimdedi, dep habarlaidy ult.kz.
Sinoptikterdiń boljamynsha, 22-30 maýsym aralyǵynda Qazaqstannyń ortalyq, shyǵys jáne ońtústik-shyǵys óńirlerinde aptap ystyq saqtalady. Ulytaý, Qaraǵandy, Aqmola, Pavlodar, Abai, Shyǵys Qazaqstan, Almaty jáne Jetisý oblystarynda aýa temperatýrasy kúndiz 30-38 gradýsqa deiin kóteriledi.
Al Qaraǵandy, Pavlodar jáne Almaty oblystarynyń jekelegen aýdandarynda synap baǵany 40-41 gradýsqa deiin jetip, óte qatty ystyq bolady dep kútilýde.
Mamandar mundai joǵary temperatýraǵa bailanysty atalǵan óńirlerdiń basym bóliginde joǵary jáne tótenshe órt qaýpi saqtalatynyn eskertti.
Naizaǵai, burshaq jáne daýyl kútiledi
24 maýsymda elimizdiń kóptegen oblystarynda aýa raiynyń kúrt qubylýy boljanyp otyr. Astana qalasynda jańbyr jaýyp, naizaǵai oinaidy, kúndiz burshaq túsip, daýyl bolýy múmkin. Jeldiń ekpini 15-20 m/s-qa deiin jetedi.
Sondai-aq Aqmola, Soltústik Qazaqstan, Pavlodar, Qaraǵandy, Abai jáne Shyǵys Qazaqstan oblystarynda jańbyr, naizaǵai, burshaq jáne daýyl kútiledi. Kei jerlerde qatty jańbyr jaýyp, jeldiń jyldamdyǵy 23-28 m/s-qa deiin kúsheiýi yqtimal.
Almaty, Jetisý, Jambyl jáne Túrkistan oblystarynda da ótkinshi jańbyr men naizaǵai boljanǵan. Taýly jáne taý bókterindegi aýdandarda jel kúsheiip, kei óńirlerde daýyl bolýy múmkin.
Shańdy daýyl bolatyn óńirler
Soltústik Qazaqstan, Pavlodar, Abai jáne Mańǵystaý oblystarynyń jekelegen aýdandarynda shańdy daýyl kútiledi. Bul ýaqytta turǵyndarǵa alys jolǵa shyqqanda saqtyq sharalaryn saqtaý usynylady.
Qyzylorda oblysynda jeldiń ekpini 15-20 m/s-qa deiin kúsheise, Aqtóbe, Atyraý, Batys Qazaqstan jáne Qostanai oblystarynda jańbyr men naizaǵai boljanyp otyr.
Turǵyndarǵa eskertý
Tótenshe jaǵdailar qyzmeti azamattardy aýa raiynyń qolaisyz qubylystary kezinde qaýipsizdik talaptaryn saqtaýǵa shaqyrady. Aptap ystyq kúnderi kúnniń astynda uzaq júrmeý, kóp mólsherde sý ishý jáne órt qaýipsizdigi erejelerin qatań saqtaý qajet.
Al naizaǵai, burshaq jáne qatty jel kezinde ashyq alańdarda bolmaýǵa, aǵashtar men elektr jelileriniń mańynan aýlaq júrýge keńes beriledi.
