Мысыр археологтары елдің Жерорта теңізі жағалауындағы Марина-эль-Аламейн ауданынан, Александриядан шамамен 100 шақырым батысқа қарай, грек-рим дәуіріне жататын 18 көне жерлеу орнын анықтады, деп хабарлайды ult.kz.
Ғалымдардың болжамынша, бұл аумақта эллинизм дәуірінен Византия кезеңіне дейін гүлденген ежелгі Левкаспис порты орналасқан.
Ең ерекше олжалардың бірі – ұзындығы шамамен 2,5 метрлік гранит саркофаг. Оның қақпағы бүтін сақталған, бұл қабірдің шамамен 2 мың жыл бойы ашылмағанын көрсетеді.
Қабірлердің ішінен адам сүйектері, керамика, амфоралар және жерлеу рәсіміне арналған түрлі заттар табылған. Ал ең құнды олжа – бірнеше марқұмның аузына салынған 24 алтын бұйым. Археологтардың айтуынша, ежелгі дәстүр бойынша мұндай алтын заттар марқұмның о дүниеге аман-есен өтуіне көмектеседі деп сенілген.
