Mysyr arheologtary eldiń Jerorta teńizi jaǵalaýyndaǵy Marina-el-Alamein aýdanynan, Aleksandriiadan shamamen 100 shaqyrym batysqa qarai, grek-rim dáýirine jatatyn 18 kóne jerleý ornyn anyqtady, dep habarlaidy ult.kz.
Ǵalymdardyń boljamynsha, bul aýmaqta ellinizm dáýirinen Vizantiia kezeńine deiin gúldengen ejelgi Levkaspis porty ornalasqan.
Eń erekshe oljalardyń biri – uzyndyǵy shamamen 2,5 metrlik granit sarkofag. Onyń qaqpaǵy bútin saqtalǵan, bul qabirdiń shamamen 2 myń jyl boiy ashylmaǵanyn kórsetedi.
Qabirlerdiń ishinen adam súiekteri, keramika, amforalar jáne jerleý rásimine arnalǵan túrli zattar tabylǵan. Al eń qundy olja – birneshe marqumnyń aýzyna salynǵan 24 altyn buiym. Arheologtardyń aitýynsha, ejelgi dástúr boiynsha mundai altyn zattar marqumnyń o dúniege aman-esen ótýine kómektesedi dep senilgen.
