مىسىر ارحەولوگتارى ەلدٸڭ جەرورتا تەڭٸزٸ جاعالاۋىنداعى مارينا-ەل-الامەين اۋدانىنان, الەكساندرييادان شامامەن 100 شاقىرىم باتىسقا قاراي, گرەك-ريم دەۋٸرٸنە جاتاتىن 18 كٶنە جەرلەۋ ورنىن انىقتادى, دەپ حابارلايدى ult.kz.
عالىمداردىڭ بولجامىنشا, بۇل اۋماقتا ەللينيزم دەۋٸرٸنەن ۆيزانتييا كەزەڭٸنە دەيٸن گٷلدەنگەن ەجەلگٸ لەۆكاسپيس پورتى ورنالاسقان.
ەڭ ەرەكشە ولجالاردىڭ بٸرٸ – ۇزىندىعى شامامەن 2,5 مەترلٸك گرانيت ساركوفاگ. ونىڭ قاقپاعى بٷتٸن ساقتالعان, بۇل قابٸردٸڭ شامامەن 2 مىڭ جىل بويى اشىلماعانىن كٶرسەتەدٸ.
قابٸرلەردٸڭ ٸشٸنەن ادام سٷيەكتەرٸ, كەراميكا, امفورالار جەنە جەرلەۋ رەسٸمٸنە ارنالعان تٷرلٸ زاتتار تابىلعان. ال ەڭ قۇندى ولجا – بٸرنەشە مارقۇمنىڭ اۋزىنا سالىنعان 24 التىن بۇيىم. ارحەولوگتاردىڭ ايتۋىنشا, ەجەلگٸ دەستٷر بويىنشا مۇنداي التىن زاتتار مارقۇمنىڭ و دٷنيەگە امان-ەسەن ٶتۋٸنە كٶمەكتەسەدٸ دەپ سەنٸلگەن.
