Маңғыстау облысында полицейлер көліктің жүксалғышынан 205 келі бекіре балығын тәркіледі, деп хабарлайды ult.kz.
Polisia.kz мәліметінше, 28 тамызда Ақтау қаласында криминалдық полиция қызметкерлері жедел-іздестіру іс-шаралары барысында Toyota Camry автокөлігін тоқтатқан.
Көлікті тінту кезінде жүксалғыштан сегіз пакетке салынған 50 дана бекіре балығы табылды. Жалпы салмағы – 205 келі.
Автокөліктегі екі ер адам ұсталып, полиция бөліміне жеткізілді.
Аталған дерек бойынша ҚР Қылмыстық кодексінің 339-бабы 1-бөлігімен қылмыстық іс қозғалды. Тәркіленген балық жауапты сақтауға берілді.
Қазір тергеу амалдары жалғасып жатыр.
