"Ирак ақпарат құралдарының мәліметінше, қашқын тәжік полковнигі Гулмурод Халимов «Ислам мемлекеті» террористік тобының әскери лидері болып тағайындалған", - деп жазады centralasian.org.
Alsumaria.tv порталы сенбі, 3 қырқүйекте Найнава ирак провинциясындағы қауіпсіздік қызметінің дереккөзіне сілтеме жасап, «Ислам мемлекеті» Тәжікстаннан қашып кеткен полковник Гулмурод Халимовты қаза тапқан Абу Умар аш-Шишанидің орнынан әскери қолбасшы етіп тағайындалғанын хабарлады.
Аталған порталдың мәліметінше, ИМ бұл тағайындауды АҚШ жетекшілік ететін халықаралық коалицияның шабуылдарынан қауіптеніп, ресми түрде жарияламаған. Осыған дейін ИМ-нің көптеген қолбасшылары әуе шабуылдарынан қаза тапқан.
Бірнеше күн бұрын АҚШ ИМ-нің құрамына қосылған тәжік полковнигінің мекен-жайы туралы ақпарат бергендерге, 3 миллион доллар төлеуге дайынбыз деп мәлімдеген. Халимовты террористік топтың басты фигураларының бірі деп есептейді.
Тәжікстан ішкі істер министрлігінің бұрынғы полковнигі әскери мерген болған. 2003-2014 жылдары америкалық терроризмге қарсы күрес орталығында арнайы жаттығудан өткен. Гулмурод Халимов 2014 жылдың сәуір айында жоғалып кетті. Бір айдан соң Сириядан табылды.
