FIFA 2026 жылы АҚШ, Канада және Мексикада өтетін 2026 FIFA World Cup қарсаңында бірқатар жаңа ережелер енгізетінін мәлімдеді, деп хабарлайды ult.kz.
Жаңа талаптар ойын қарқынын арттыруға, уақыт созуды азайтуға және спорттық емес әрекеттер үшін жауапкершілікті күшейтуге бағытталған.
Ең көп талқыланып жатқан өзгерістердің бірі ойыншылардың алаңдағы мінез-құлқына қатысты. Енді футболшы дау-дамай немесе жанжал кезінде аузын қолымен, жейдесімен немесе басқа затпен жауып сөйлесе, қызыл қағаз алуы мүмкін. Бұл шешім қорлау мен кемсітушілік сипаттағы сөздердің алдын алу үшін қабылданған.
Сондай-ақ төреші шешіміне наразылық білдіріп, алаңнан кетіп қалған ойыншылар бірден алаңнан қуылады. Егер команданың әрекеті матчтың тоқтатылуына немесе үзілуіне себеп болса, оған техникалық жеңіліс жазылуы ықтимал.
Уақыт созуға қарсы шаралар да күшейтіледі. Аут лақтыру немесе қақпадан доп шығару кезінде төреші бес секундтық кері санақ жүргізе алады. Белгіленген уақыт ішінде доп ойынға қосылмаса, құқық қарсылас командаға беріледі.
Ойыншы ауыстыру тәртібі де өзгереді. Ауыстырылатын футболшы алаңнан 10 секунд ішінде және өзіне ең жақын шет сызық арқылы шығуы тиіс. Егер ол уақыт созса, оның орнына кіретін ойыншы келесі үзіліске дейін алаңға шыға алмайды.
Жаңа ережелер медициналық көмек көрсету тәртібіне де әсер етеді. Егер алаң ойыншысы дәрігер көмегін алса, ойын қайта басталғаннан кейін бір минут бойы алаң сыртында болуы қажет. Бұл талап ауыр жарақат алған футболшылар мен қақпашыларға қолданылмайды.
Бұдан бөлек, VAR жүйесінің өкілеттігі кеңейтіледі. Бейнетөрешілер екінші сары қағаздан кейінгі қате алаңнан қуу шешімдеріне, ойыншыны қате анықтау жағдайларына және кейбір стандартты жағдайлар алдындағы төреші қателіктеріне араласа алады.
Әлем чемпионаты матчтарында әр таймда міндетті түрде үш минуттық су ішу үзілісі енгізіледі. Ол шамамен таймның 22-минутында өткізіледі деп жоспарланып отыр.
ФИФА бұл өзгерістер ойынның қарқынын арттырып, уақыт созу әрекеттерін азайтуға және футболшылардың тәртібін жақсартуға ықпал етеді деп есептейді.
