FIFA 2026 jyly AQSh, Kanada jáne Meksikada ótetin 2026 FIFA World Cup qarsańynda birqatar jańa erejeler engizetinin málimdedi, dep habarlaidy ult.kz.
Jańa talaptar oiyn qarqynyn arttyrýǵa, ýaqyt sozýdy azaitýǵa jáne sporttyq emes áreketter úshin jaýapkershilikti kúsheitýge baǵyttalǵan.
Eń kóp talqylanyp jatqan ózgeristerdiń biri oiynshylardyń alańdaǵy minez-qulqyna qatysty. Endi fýtbolshy daý-damai nemese janjal kezinde aýzyn qolymen, jeidesimen nemese basqa zatpen jaýyp sóilese, qyzyl qaǵaz alýy múmkin. Bul sheshim qorlaý men kemsitýshilik sipattaǵy sózderdiń aldyn alý úshin qabyldanǵan.
Sondai-aq tóreshi sheshimine narazylyq bildirip, alańnan ketip qalǵan oiynshylar birden alańnan qýylady. Eger komandanyń áreketi matchtyń toqtatylýyna nemese úzilýine sebep bolsa, oǵan tehnikalyq jeńilis jazylýy yqtimal.
Ýaqyt sozýǵa qarsy sharalar da kúsheitiledi. Aýt laqtyrý nemese qaqpadan dop shyǵarý kezinde tóreshi bes sekýndtyq keri sanaq júrgize alady. Belgilengen ýaqyt ishinde dop oiynǵa qosylmasa, quqyq qarsylas komandaǵa beriledi.
Oiynshy aýystyrý tártibi de ózgeredi. Aýystyrylatyn fýtbolshy alańnan 10 sekýnd ishinde jáne ózine eń jaqyn shet syzyq arqyly shyǵýy tiis. Eger ol ýaqyt sozsa, onyń ornyna kiretin oiynshy kelesi úziliske deiin alańǵa shyǵa almaidy.
Jańa erejeler meditsinalyq kómek kórsetý tártibine de áser etedi. Eger alań oiynshysy dáriger kómegin alsa, oiyn qaita bastalǵannan keiin bir minýt boiy alań syrtynda bolýy qajet. Bul talap aýyr jaraqat alǵan fýtbolshylar men qaqpashylarǵa qoldanylmaidy.
Budan bólek, VAR júiesiniń ókilettigi keńeitiledi. Beinetóreshiler ekinshi sary qaǵazdan keiingi qate alańnan qýý sheshimderine, oiynshyny qate anyqtaý jaǵdailaryna jáne keibir standartty jaǵdailar aldyndaǵy tóreshi qatelikterine aralasa alady.
Álem chempionaty matchtarynda ár taimda mindetti túrde úsh minýttyq sý ishý úzilisi engiziledi. Ol shamamen taimnyń 22-minýtynda ótkiziledi dep josparlanyp otyr.
FIFA bul ózgerister oiynnyń qarqynyn arttyryp, ýaqyt sozý áreketterin azaitýǵa jáne fýtbolshylardyń tártibin jaqsartýǵa yqpal etedi dep esepteidi.
