Танымал әнші Мейрамбек Беспаевтың жұбайы Мархабат өнер иесімен алғаш кездескен сәтін еске алды. Ол болашақ күйеуінің назарын күтпеген жерден аударғанын “Хабар” арнасының “МузАРТ – 25 жыл” әнсапар күнделігінде айтып берді, деп хабарлайды ult.kz.
Мархабаттың сөзінше, олардың таныстығы 2002 жылы Алматыдағы Республика сарайында басталған. Сол күні концерттен кейін жанкүйер қыздар әншілермен суретке түсуге асыққан. Ал Мархабат көпшілікке қосылмай, шетте тұрған. Оның бұл әрекеті Мейрамбектің назарынан тыс қалмапты.
“2002 жылы осы Республика сарайында танысқанбыз. Олар ән айтып болып шықты. Қыздардың бәрі суретке түсеміз деп жүгірді. Мен: “Кім? Неге жүгіріп жатыр?” деп тұрмын. Сол кезде мені көріп: “Ана қыз неге суретке түсуге келмей тұр? Шақырыңдар”, – деді. Мен де: “Жарайды, түсе салайын”, – дедім. Сол кезде “Танысайық” деп, таныстығымыз басталды”, – деді Мархабат.
Осылайша, әншімен суретке түсуге асықпаған бойжеткеннің өзі оның назарын аударып, кездейсоқ жүздесу болашақ отбасының құрылуына себеп болған.
Айта кетейік, Мархабат бұған дейін де алғашқы таныстықтары жайлы естелігімен бөліскен. Оның айтуынша, екеуі 2002 жылдың желтоқсанында танысқан. Сол кезде құрбысының шақыруымен студенттер кешіне барған ол “МузАРТ” тобын да, Мейрамбек Беспаевты да танымаған. Бұл туралы әншінің жары 2024 жылы айтып, алғашқы кездесуде түсірілген суретті де көпшілікке көрсеткен. KAZ.NUR.KZ басылымы осы естелік туралы жазған. Уақыт өте олардың таныстығы махаббатқа ұласып, 2004 жылғы 8 шілдеде шаңырақ көтерген. Massaget.kz мәліметінше, жұп 2014 жылы отбасылық өмірінің он жылдығын атап өткен.
Бағдарламада Мархабат жолдасының шығармашылық ұжымы – “МузАРТ” тобының 25 жылдық мерейтойына орай ізгі тілегін де арнады.
“25 жылдықтарыңыз құтты болсын! Алла қаласа, 50 жылдықта да осылай үш күн концерт беру бұйырсын. Алла нәсіп етсін”, – деп ақжарма тілегін жеткізді ол.
Осылайша, бір кездері әншімен суретке түсуге қызықпаған Мархабат кейін оның өмірлік серігіне айналды.
Мейрамбек Беспаев кім?
Мейрамбек Әбіләшімұлы Беспаев – қазақстандық танымал әнші, термеші, актер және “МузАРТ” тобының мүшесі. Ол 1976 жылы Жамбыл облысының Талас ауданында дүниеге келген. Болашақ әнші бала кезінен музыкаға қызығушылық танытып, өнер жолын ерте бастаған. Тараз қаласындағы Глинка атындағы музыкалық мектептің қобыз сыныбында білім алған. 1989 жылы Алматыдағы Күләш Байсейітова атындағы музыкалық мектепке ауысқан. Кейін Тұрар Жүргенов атындағы өнер академиясында актерлік мамандық бойынша білім алған. Еңбек жолын Сүйінбай атындағы филармонияда әнші ретінде бастаған. Жас кезінен “Бозторғай” әнін орындап, көпшілікке танылып, “қазақтың Бозторғайы” атанған.
Оның репертуарында “Кеш жарық”, “Шашбаулым”, “Өз елім” сияқты танымал шығармалар бар. 2002-2007 жылдары “Қазақконцерт” ұйымында әнші болып қызмет атқарған. Ол Сәкен Майғазиев және Кенжебек Жанәбіловпен бірге “МузАРТ” тобының құрамында өнер көрсетіп, қазақ эстрадасының дамуына үлес қосты.
Мейрамбек Беспаев “Ғашық жүрек” және “Ғашық жүрек 2” фильмдеріне де түскен. Өнердегі жетістіктері үшін “Дарын” мемлекеттік жастар сыйлығын иеленген. 2012 жылы оған “Қазақстанның еңбек сіңірген қайраткері” құрметті атағы берілді. Әншінің жұбайы – Мархабат, екеуі 2004 жылы шаңырақ көтерген.
