foxnews.com ۆيدەوسىنان الىنعان كادر
اتلانت مۇحيتىندا جارىلعان «تيتان» سٷڭگۋٸر قايىعىندا بولعان OceanGate كومپانيياسىنىڭ باس ديرەكتورى ستوكتون راشتىڭ ەيەلٸ - «تيتانيكتە» قازا تاپقان جولاۋشىلاردىڭ بٸرٸنٸڭ تٸكەلەي ۇرپاعى, دەپ حابارلايدى "قازاقپارات" حاا Fox News ارناسىنا سٸلتەمە جاساپ.
راش – 18 ماۋسىمدا ٶز كومپانيياسىنا تيەسٸلٸ «تيتان» سٷڭگۋٸر كەمەسٸمەن «تيتانيك» قالدىقتارىن كٶرۋگە اتتانعان بەس جولاۋشىنىڭ بٸرٸ. ونىڭ ەيەلٸ ۆەندي راش – يسادور مەن يدا شتراۋستىڭ شٶبەرەسٸ, ولار 1912 جىلى اتلانت مۇحيتى ارقىلى ساياحاتتاۋ كەزٸندە ايسبەرگكە سوعىلىپ, سۋعا باتىپ كەتكەن الىپ كەمە «تيتانيكتەگٸ» 1500-دەن استام ادامنىڭ اراسىندا بولعان. «تيتانيك» سۋعا باتىپ بارا جاتقاندا ەرلٸ-زايىپتى شتراۋستار كەمەدە قالۋعا شەشٸم قابىلدايى.
«ەكيپاج ەيەلدەر مەن بالالاردى قۇتقارماق بولعان كەزدە يدا شتراۋس قۇتقارۋ قايىعىنا وتىرۋدان باس تارتقان», - دەيدٸ ولاردىڭ شٶبەرەسٸ پول كۋرتسمان Fox News-كە بەرگەن سۇحباتىندا.
فوتو: Getty Images
دجەيمس كەمەروننىڭ 1997 جىلعى «تيتانيك» بلوكباستەرٸندە ولاردىڭ ماحاببات تاريحى (تٶسەكتە قول ۇستاسىپ جاتقان قارت ەرلٸ-زايىپتى) كٶرٸنٸس تابادى.
ۆەندي مەن ستوكتون راش 1986 جىلى ٷيلەنگەن. LinkedIn پلاتفورماسىنداعى پاراقشاسىندا كٶرسەتٸلگەن اقپاراتقا قاراعاندا ۆەندي OceanGate كومپانيياسىندا بايلانىس ديرەكتورى بولىپ جۇمىس ٸستەيدٸ. ول بۇعان دەيٸن OceanGate قورىنىڭ پرەزيدەنتٸ قىزمەتٸن اتقارعان.
ەسكە سالايىق, 61 جاستاعى ستوكتون راش ٶزگە 4 اداممەن بٸرگە مٸنگەن «تيتان» باتيسكافىنىڭ ەكيپاجى جەكسەنبٸ كٷنٸ اتلانت مۇحيتىنىڭ تٷبٸنە سەگٸز ساعاتتىق سٷڭگۋگە اتتانعان بولاتىن.
شامامەن 1 ساعات 45 مينۋتتىق ساپاردان كەيٸن سٷڭگۋٸر قايىق كانادالىق «پوليارنىي پرينتس» زەرتتەۋ كەمەسٸمەن بايلانىسىن ٷزدٸ. اۋقىمدى ٸزدەستٸرۋ-قۇتقارۋ وپەراتسيياسى نيۋفاۋندلەند (كانادا) جاعالاۋىندا جەرگٸلٸكتٸ ۋاقىت بويىنشا 17:40 شاماسىندا, «تيتان» سۋ بەتٸنە شىعۋى تيٸس بولعاننان كەيٸن شامامەن ٷش ساعات ٶتكەن سوڭ باستالدى.
كٷنٸ كەشە اقش جاعالاۋ كٷزەتٸ سولتٷستٸك اتلانت مۇحيتىندا جوعالىپ كەتكەن «تيتان» سٷڭگۋٸر قايىعىن ٸزدەستٸرۋ ايماعىنان ەلدەبٸر جٷزۋ قۇرالىنىڭ جارىقشاقتارى مەن سىنىقتارى تابىلعانىن حابارلادى. بورتتا بولعان بەس ادام دا قازا تاپقان.
