foxnews.com videosynan alynǵan kadr
Atlant muhitynda jarylǵan «Titan» súńgýir qaiyǵynda bolǵan OceanGate kompaniiasynyń bas direktory Stokton Rashtyń áieli - «Titanikte» qaza tapqan jolaýshylardyń biriniń tikelei urpaǵy, dep habarlaidy "QazAqparat" HAA Fox News arnasyna silteme jasap.
Rash – 18 maýsymda óz kompaniiasyna tiesili «Titan» súńgýir kemesimen «Titanik» qaldyqtaryn kórýge attanǵan bes jolaýshynyń biri. Onyń áieli Vendi Rash – Isador men Ida Shtraýstyń shóberesi, olar 1912 jyly Atlant muhity arqyly saiahattaý kezinde aisbergke soǵylyp, sýǵa batyp ketken alyp keme «Titaniktegi» 1500-den astam adamnyń arasynda bolǵan. «Titanik» sýǵa batyp bara jatqanda erli-zaiypty Shtraýstar kemede qalýǵa sheshim qabyldaiy.
«Ekipaj áielder men balalardy qutqarmaq bolǵan kezde Ida Shtraýs qutqarý qaiyǵyna otyrýdan bas tartqan», - deidi olardyń shóberesi Pol Kýrtsman Fox News-ke bergen suhbatynda.
Foto: Getty Images
Djeims Kemeronnyń 1997 jylǵy «Titanik» blokbasterinde olardyń mahabbat tarihy (tósekte qol ustasyp jatqan qart erli-zaiypty) kórinis tabady.
Vendi men Stokton Rash 1986 jyly úilengen. LinkedIn platformasyndaǵy paraqshasynda kórsetilgen aqparatqa qaraǵanda Vendi OceanGate kompaniiasynda bailanys direktory bolyp jumys isteidi. Ol buǵan deiin OceanGate qorynyń prezidenti qyzmetin atqarǵan.
Eske salaiyq, 61 jastaǵy Stokton Rash ózge 4 adammen birge mingen «Titan» batiskafynyń ekipajy jeksenbi kúni Atlant muhitynyń túbine segiz saǵattyq súńgýge attanǵan bolatyn.
Shamamen 1 saǵat 45 minýttyq sapardan keiin súńgýir qaiyq kanadalyq «Poliarnyi prints» zertteý kemesimen bailanysyn úzdi. Aýqymdy izdestirý-qutqarý operatsiiasy Niýfaýndlend (Kanada) jaǵalaýynda jergilikti ýaqyt boiynsha 17:40 shamasynda, «Titan» sý betine shyǵýy tiis bolǵannan keiin shamamen úsh saǵat ótken soń bastaldy.
Kúni keshe AQSh jaǵalaý kúzeti Soltústik Atlant muhitynda joǵalyp ketken «Titan» súńgýir qaiyǵyn izdestirý aimaǵynan áldebir júzý quralynyń jaryqshaqtary men synyqtary tabylǵanyn habarlady. Bortta bolǵan bes adam da qaza tapqan.
