قوستاناي وبلىسىندا 2019 جىلى تۋعان بٷلدٸرشٸن ەكٸ قاباتتى كٶپپەتەرلٸ تۇرعىن ٷيدٸڭ ەكٸنشٸ قاباتىنىڭ تەرەزەسٸنەن قۇلاپ, امان قالدى, دەپ حابارلايدى "ۇلت اقپارات" وبلىستىق تجد باسپاسٶز قىزمەتٸنە سٸلتەمە جاساپ.
وقيعا 26 قاڭتار ساعات 16:35 كەزٸندە رۋدنىي قالاسىنىڭ توبىل كٶشەسٸندە بولعان.
2 جاسار بالا ٷيٸندە 20 جاستاعى ەپكەسٸمەن بٸرگە بولعان.
ەپكەسٸ قوناق بٶلمەدە وتىرعاندا, سەبي اس ٷيدەگٸ تەرەزە ماڭىندا ويناپ جانىندا ويناپ جٷرگەن.
كەنەت ول اشىق قالعان تەرەزەدەن سىرتقا قۇلاپ كەتكەن.
ابىروي بولعاندا بالا ٷيٸلگەن قاردىڭ ٷستٸنە تٷسكەن. كٸشكەنتاي قىز بٸردەن رۋدنىي كٶپسالالى اۋرۋحاناسىنا جەتكٸزٸلدٸ.
«تەكسەرۋدەن كەيٸن بالالار بٶلٸمٸنٸڭ دەرٸگەرلەرٸ ونىڭ ٶمٸرٸنە ەش قاۋٸپ تٶنٸپ تۇرماعانىن ايتىپ, اۋرۋحاناعا جاتقىزۋدىڭ قاجەتٸ جوق دەگەن قورىتىندىعا كەلدٸ. قازٸرگٸ ۋاقىتتا بالا ٷيدە اتا-اناسىنىڭ قاراۋىندا» دەيدٸ ۆەدومستۆونىڭ باسپاسٶز حاتشىسى ۋەليحان دوسانوۆ.
وبلىستىق تجد بالالاردى ٷيدە قاراۋسىز قالدىرماۋعا, قاۋٸپسٸزدٸك ەرەجەلەرٸن بارىنشا ساقتاۋعا شاقىرادى.
سونىمەن قاتار تەرەزەلەرگە قاۋٸپسٸزدٸك تورىن ورناتۋدى ۇسىنادى.
