مىسىردا ۇستالعان قازاقستاندىق ستۋدەنتتەر ەلگە ورالدى. بۇل تۋرالى سىرتقى ٸستەر مينيسترلٸگٸ باسپاسٶز قىزمەتٸنٸڭ جەتەكشٸسٸ ەنۋار جايناقوۆ ٶزٸنٸڭ Facebook-تەگٸ جەكە پاراقشاسىندا مەلٸمدەدٸ, دەپ حابارلايدى "ۇلت اقپارات".
«ەلٸمٸزدٸڭ بارلىق التى ازاماتى بٷگٸن مىسىردان ٶز ەلٸنە امان-ەسەن ورالدى. قازٸر ولار ٶز ٷيلەرٸنە تۋىستارى مەن جاقىندارىنا بارا جاتىر», - دەپ جازدى ول.
ەسكە سالا كەتسەك, وسىعان دەيٸن مىسىردا 6 ستۋدەنتتٸڭ جوعالىپ كەتكەندٸگٸ تۋرالى اقپارات جارييالانىپ, كەيٸنٸرەك ستۋدەنتتەردٸڭ مىسىردىڭ قۇقىق قورعاۋ ورگانىندا بولعاندىعى انىقتالعان بولاتىن. وسىعان بايلانىستى قازاقستان مىسىرعا رەسمي نارازىلىق نوتاسىن جٸبەرگەن.
1 تامىزدا مىسىردىڭ ۇلتتىق قاۋٸپسٸزدٸك قىزمەتٸ قازاقستان ەلشٸلٸگٸمەن حابارلاسىپ, التى ازاماتتىڭ ەلٸنە قايتارىلاتىنىن حابارلاعان. قازاقستاندىق التى ازاماتتىڭ ول جاقتا نە ٷشٸن ۇستالعانى ەلٸ بەلگٸسٸز بولىپ وتىر.
