Mysyrda ustalǵan qazaqstandyq stýdentter elge oraldy. Bul týraly Syrtqy ister ministrligi baspasóz qyzmetiniń jetekshisi Ánýar Jainaqov óziniń Facebook-tegi jeke paraqshasynda málimdedi, dep habarlaidy "Ult aqparat".
«Elimizdiń barlyq alty azamaty búgin Mysyrdan óz eline aman-esen oraldy. Qazir olar óz úilerine týystary men jaqyndaryna bara jatyr», - dep jazdy ol.
Eske sala ketsek, osyǵan deiin Mysyrda 6 stýdenttiń joǵalyp ketkendigi týraly aqparat jariialanyp, keiinirek stýdentterdiń Mysyrdyń quqyq qorǵaý organynda bolǵandyǵy anyqtalǵan bolatyn. Osyǵan bailanysty Qazaqstan Mysyrǵa resmi narazylyq notasyn jibergen.
1 tamyzda Mysyrdyń ulttyq qaýipsizdik qyzmeti Qazaqstan elshiligimen habarlasyp, alty azamattyń eline qaitarylatynyn habarlaǵan. Qazaqstandyq alty azamattyń ol jaqta ne úshin ustalǵany áli belgisiz bolyp otyr.
