فوتو: Qalan Group
قازاق كينەماتوگرافيياسىنىڭ التىن قورىنا ەنگەن ابدوللا قارساقباەۆتىڭ 1963 جىلى تٷسٸرگەن «مەنٸڭ اتىم – قوجا» فيلمٸ ۇلتتىق مەدەنيەتتٸڭ مەڭگٸلٸك تۋىندىلارىنىڭ بٸرٸ. الايدا, زامان ٶزگەرگەن سايىن كلاسسيكالىق فيلمنٸڭ ۆيزۋالدىق شەشٸمدەرٸ قازٸرگٸ ۇرپاق ٷشٸن ٶزەكتٸلٸگٸن جوعالتىپ بارادى. وسى ولقىلىقتى تولىقتىرىپ, قوجانىڭ جاڭاشا بەينەسٸن ۇسىنۋدى ماقسات ەتكەن Qalan Group شىعارماشىلىق توبى «قوجا. جاڭا ساياحات» فيلمٸن جارىققا شىعارىپ جاتىر. پرەمەراسى 13 ناۋرىزعا جوسپارلانعان بۇل تۋىندىنىڭ ەرەكشەلٸكتەرٸن Ult.kz شىعارماشىلىق توپتان سۇراپ بٸلدٸ.
«مەنٸڭ اتىم قوجانىڭ» جالعاسى
ستسەناريي اۆتورلارىنىڭ بٸرٸ سادىق شەرٸمبەكتٸڭ ايتۋىنشا, بۇل فيلم «مەنٸڭ اتىم قوجانىڭ» جالعاسى. ستسەناريي بەردٸبەك سوقپاقباەۆتىڭ پوۆەسٸ نەگٸزٸندە جازىلعانىمەن, وقيعا جەلٸسٸ بٶلەك.
«كٶز الدىمىزدا تاريحي تٸزبەك جاسالدى. ۆيدەولاردىڭ ٷزٸندٸسٸ العاش شىققان سەتتەن باستاپ حالىق جىلى قابىلدادى. قۋانتاتىنى قازاق حالقى قازٸر مەدەني توق ۇلتقا اينالىپ كەلە جاتىر. ٶز قۇندىلىقتارىمىزدىڭ نەگٸزٸندە جاسالعان ٶنٸمدەردٸ باعالاۋ ٷشٸن سىرتتىڭ كٶزقاراسى قاجەت ەمەس. ٶز فيلمدەرٸمٸز, ٶز مۋزىكامىز, تٷرلٸ تەاترىمىز ٷزدٸكسٸز دامۋ ٷستٸندە. بٷگٸندە بٸزبەن قاتار پروكاتقا شىعاتىن بٸرنەشە وتاندىق فيلم تٷسٸرٸلٸپ جاتىر. بارلىعىنا دا بارىڭىزدار دەپ كەڭەس بەرەمٸن. ولاردى بەسەكەلەستەر ەمەس, مٷددەلەستەر دەپ قابىلدايمىز», - دەيدٸ سادىق شەرٸمبەك.
فوتو: Qalan Group
«مەنٸڭ اتىم قوجا» ەركٸندٸككە ۇمتىلعان ۇلتتىڭ بولمىسىن كٶرسەتسە, «قوجا. جاڭا ساياحات» تەۋەلسٸزدٸك العان قوعام رەتٸندە ەركٸندٸككە جەتكەن رۋحتىڭ بەينەسٸن جەتكٸزۋگە تىرىسقان.
«كەڭەس ٷكٸمەتٸ فيلمنٸڭ بٸراز تۇسىن تسەنزۋرادان ٶتكٸزبەي, قىرقىپ تاستاعانىن بٸلەمٸز. سونىڭ ٶزٸندە ەركٸندٸك مەسسەدجٸن بٸزگە جەتكٸزە العان ابدوللا قارساقباەۆ اتامىزدىڭ ەڭبەگٸنە باسىمىزدى يەمٸز. بٸزدٸڭ تٷسٸرٸلٸم توپ تەۋەلسٸزدٸك العان قوعام رەتٸندە ەركٸندٸككە جەتكەن رۋحتىڭ بەينەسٸن جەتكٸزۋگە تىرىستىق. نەگٸزٸ بۇل فيلمدٸ 30 جىلعا كەش تٷسٸردٸك دەپ ويلايمىن. «مەنٸڭ اتىم قوجا» - وسى ەلدٸڭ قوجاسىمىن, يەسٸمٸن, تەۋەلسٸزبٸن دەگەن سٶز. وسى وبرازدى الىپ شىعۋعا تىرىستىق», - دەيدٸ ستسەناريست.
سۇرانىستان تۋعان فيلم
قازاقستانداعى, شىعىستاعى, جالپى تٷركٸ ەلەمٸندەگٸ عىلىمدى قايتا جاڭعىرتۋ ميسسيياسىن كٶزدەگەن Qalan group كومپانيياسى بٸر كەزدەرٸ قوجا وبرازىن روليكتەردە پايدالانىپ, قىسقا سكەتچ تٷرٸندە ەلەۋمەتتٸك جەلٸلەردە ۇسىنا باستاعان. بۇل بەينەجازبالاردى كٶبٸ فيلمنەن ٷزٸندٸ دەپ ويلاي باستاعان. كومپانييانىڭ سٶيتٸپ فيلم تٷسٸرمەسكە امالى قالماپتى.
«فيلم قاشان شىعادى, تولىق نۇسقاسىن قاشان كٶرەمٸز دەگەن سۇراقتار كٶپ بولدى. سودان كومپانييامىز «قوجا. جاڭا ساياحات» فيلمٸن تٷسٸرۋدٸ باستاپ كەتتٸ. قوجانىڭ قانشا سوتقار بولسا دا, ارمانشىلدىعى, بٸلٸمگە دەگەن قۇشتارلىعى دا فيلمنٸڭ جالعاسىن تٷسٸرۋگە تٷرتكٸ بولدى», - دەدٸ سادىق شەرٸمبەك.
جاڭا قوجانى ەكرانعا شىعارۋدى رەجيسسەر قۋات يبراگيموۆ قولعا العان, ال ستسەناريستەرٸ – سادىق شەرٸمبەك, نۇردەۋلەت وماربەك, نۇرجٸگٸت حايدار, ەلي وڭعار. فيلمگە اسىلتاي تاسبولات, دوسحان جىلقىباي, تالعات مەڭدٸباي رەداكتۋرالىق ەتكەن.
فوتو: Qalan Group
جاس اكتەرلەر تاماشا ويناپ شىقتى
اۆتورلار كاستينگ جٷرگٸزۋ دە, بالالاردى تٷسٸرٸلٸمگە دايىنداۋ دا وڭاي پروتسەسس بولعان جوق دەيدٸ. بەس ايعا جۋىق بالالار ٶز كەيٸپكەرلەرٸن تەرەڭ زەرتتەگەن.
«مەنٸڭ اتىم قوجانى» جيىرماعا جۋىق رەت كٶرٸپ شىقتى, كٸتابىن قانشا رەت وقىعانى سانىنان جاڭىلىسىپ قالدىق. اكتەرلٸك شەبەرلٸك بويىنشا بالالاردى ەۋەزوۆ اتىنداعى قازاق ۇلتتىق دراما تەاترىنىڭ اكتريساسى, قازاقستان رەسپۋبليكاسىنىڭ جاستار وداعى «سەرپەر» سىيلىعىنىڭ لاۋرەاتى زەۋرە كٶپجاساروۆا دايىندادى. ايقىن ەلۋباي (قوجا) مەن نۇرلان سانجار اعانىڭ جٷرٸسٸنە دەيٸن بٸردەي بولىپ شىققانىنا قايران قالدىق. 62 جىل بۇرىن تٷسٸرٸلٸم توبىندا بولعان, كٶزٸ تٸرٸ بارلىق مامانداردى ٸزدەدٸك, بٸرگە جۇمىس جاسالدى», - دەيدٸ ول.
فوتو: Orda.kz
ماعان ەرەكشە قۇرمەت كٶرسەتٸلدٸ
Ult.kz «مەنٸڭ اتىم قوجا» فيلمٸندە باستى رٶل ويناعان اكتەر نۇرلان سەگٸزباەۆتان پٸكٸر الىپ, جاڭا فيلمگە كٶزقاراسىن بٸلدٸ.
نۇرلان سەگٸزباەۆ بۇل فيلمدٸ باياعىدا تٷسٸرۋ كەرەك بولعان دەيدٸ. قازٸر ۋاقىت باسقا, قازاقستان دا جاڭا ەل, سوندىقتان ونىڭ كەيٸپكەرلەرٸ دە جاڭارۋى تيٸس.
«فيلم اۆتورلارى ماعان كەلٸپ, ستسەنارييٸن جەتٸلدٸرۋدە كٶمەك سۇرادى. ماتەريالدارى ٶتە جاقسى, پوزيتيۆتٸ, كٶڭٸلدٸ. مەنٸڭ ويىمشا, جاڭا فيلم حالىققا ۇنايدى. كەشە فيلم اۆتورلارى ماعان كەلٸپ, پروكات الدىندا باتامدى العىسى كەلدٸ. مەن ولارعا سەتتٸلٸك تٸلەپ, بۇل وبرازدىڭ كٷشٸ نەدە ەكەنٸن تٷسٸندٸردٸم. بۇل – بٸزدٸڭ زامانىمىزدىڭ قاھارمانى, ال ول ٶمٸرشەڭ, شىنايى بولۋى تيٸس. فيلمنٸڭ جاڭا دەۋٸردە ٶز بولاشاعى بار. حالىق ونى قابىلدايدى دەپ سەنەمٸن», - دەيدٸ نۇرلان سەگٸزباەۆ.
شىنتۋايتىندا ٶزٸ دە فيلمدە بوي كٶرسەتەتٸن جاسىرمادى.
«بۇل فيلمدە بٸر قۇپييا بار. سوڭعى كادردا جازۋشى ٶز شىعارماسىن اياقتاپ جاتادى. كامەرا جاقىنداپ كەلٸپ, جازۋشىنىڭ جٷزٸنە توقتايدى. ول جازۋشى – مەن! بۇل مەتافورا: مەن, قارتايعان قوجا, جاڭا قاھارمان تۋرالى جاڭا وقيعانى جازىپ شىقتىم. كەيٸن تٷسٸرٸلٸم توبى ماعان قىمبات شاپان كيگٸزٸپ, سىيلىقتار بەرٸپ, بانكەتكە شاقىردى. مەن سول بانكەتكە قاتىستىم. ماعان سٶز بەرٸلدٸ. ميكروفونمەن ساحناعا شىققاندا, بٷكٸل زال ورنىنان تۇرىپ, مەنٸڭ باتامدى تٸك تۇرىپ تىڭدادى. مٸنە, وسىنداي قۇرمەت كٶرسەتتٸ», - دەيدٸ قارت قوجا.
انارا باۋىرجانقىزى
