Foto: Qalan Group
Qazaq kinematografiiasynyń altyn qoryna engen Abdolla Qarsaqbaevtyń 1963 jyly túsirgen «Meniń atym – Qoja» filmi ulttyq mádeniettiń máńgilik týyndylarynyń biri. Alaida, zaman ózgergen saiyn klassikalyq filmniń vizýaldyq sheshimderi qazirgi urpaq úshin ózektiligin joǵaltyp barady. Osy olqylyqty tolyqtyryp, Qojanyń jańasha beinesin usynýdy maqsat etken Qalan Group shyǵarmashylyq toby «Qoja. Jańa saiahat» filmin jaryqqa shyǵaryp jatyr. Premerasy 13 naýryzǵa josparlanǵan bul týyndynyń erekshelikterin Ult.kz shyǵarmashylyq toptan surap bildi.
«Meniń atym Qojanyń» jalǵasy
Stsenarii avtorlarynyń biri Sadyq Sherimbektiń aitýynsha, bul film «Meniń atym Qojanyń» jalǵasy. Stsenarii Berdibek Soqpaqbaevtyń povesi negizinde jazylǵanymen, oqiǵa jelisi bólek.
«Kóz aldymyzda tarihi tizbek jasaldy. Videolardyń úzindisi alǵash shyqqan sátten bastap halyq jyly qabyldady. Qýantatyny qazaq halqy qazir mádeni toq ultqa ainalyp kele jatyr. Óz qundylyqtarymyzdyń negizinde jasalǵan ónimderdi baǵalaý úshin syrttyń kózqarasy qajet emes. Óz filmderimiz, óz mýzykamyz, túrli teatrymyz úzdiksiz damý ústinde. Búginde bizben qatar prokatqa shyǵatyn birneshe otandyq film túsirilip jatyr. Barlyǵyna da baryńyzdar dep keńes beremin. Olardy básekelester emes, múddelester dep qabyldaimyz», - deidi Sadyq Sherimbek.
Foto: Qalan Group
«Meniń atym Qoja» erkindikke umtylǵan ulttyń bolmysyn kórsetse, «Qoja. Jańa saiahat» táýelsizdik alǵan qoǵam retinde erkindikke jetken rýhtyń beinesin jetkizýge tyrysqan.
«Keńes úkimeti filmniń biraz tusyn tsenzýradan ótkizbei, qyrqyp tastaǵanyn bilemiz. Sonyń ózinde erkindik messedjin bizge jetkize alǵan Abdolla Qarsaqbaev atamyzdyń eńbegine basymyzdy iemiz. Bizdiń túsirilim top táýelsizdik alǵan qoǵam retinde erkindikke jetken rýhtyń beinesin jetkizýge tyrystyq. Negizi bul filmdi 30 jylǵa kesh túsirdik dep oilaimyn. «Meniń atym Qoja» - osy eldiń qojasymyn, iesimin, táýelsizbin degen sóz. Osy obrazdy alyp shyǵýǵa tyrystyq», - deidi stsenarist.
Suranystan týǵan film
Qazaqstandaǵy, Shyǵystaǵy, jalpy túrki álemindegi ǵylymdy qaita jańǵyrtý missiiasyn kózdegen Qalan group kompaniiasy bir kezderi Qoja obrazyn rolikterde paidalanyp, qysqa sketch túrinde áleýmettik jelilerde usyna bastaǵan. Bul beinejazbalardy kóbi filmnen úzindi dep oilai bastaǵan. Kompaniianyń sóitip film túsirmeske amaly qalmapty.
«Film qashan shyǵady, tolyq nusqasyn qashan kóremiz degen suraqtar kóp boldy. Sodan kompaniiamyz «Qoja. Jańa saiahat» filmin túsirýdi bastap ketti. Qojanyń qansha sotqar bolsa da, armanshyldyǵy, bilimge degen qushtarlyǵy da filmniń jalǵasyn túsirýge túrtki boldy», - dedi Sadyq Sherimbek.
Jańa Qojany ekranǵa shyǵarýdy rejisser Qýat Ibragimov qolǵa alǵan, al stsenaristeri – Sadyq Sherimbek, Nurdáýlet Omarbek, Nurjigit Haidar, Áli Ońǵar. Filmge Asyltai Tasbolat, Doshan Jylqybai, Talǵat Meńdibai redaktýralyq etken.
Foto: Qalan Group
Jas akterler tamasha oinap shyqty
Avtorlar kasting júrgizý de, balalardy túsirilimge daiyndaý da ońai protsess bolǵan joq deidi. Bes aiǵa jýyq balalar óz keiipkerlerin tereń zerttegen.
«Meniń atym Qojany» jiyrmaǵa jýyq ret kórip shyqty, kitabyn qansha ret oqyǵany sanynan jańylysyp qaldyq. Akterlik sheberlik boiynsha balalardy Áýezov atyndaǵy Qazaq ulttyq drama teatrynyń aktrisasy, Qazaqstan Respýblikasynyń Jastar odaǵy «Serper» syilyǵynyń laýreaty Záýre Kópjasarova daiyndady. Aiqyn Elýbai (Qoja) men Nurlan Sanjar aǵanyń júrisine deiin birdei bolyp shyqqanyna qairan qaldyq. 62 jyl buryn túsirilim tobynda bolǵan, kózi tiri barlyq mamandardy izdedik, birge jumys jasaldy», - deidi ol.
Foto: Orda.kz
Maǵan erekshe qurmet kórsetildi
Ult.kz «Meniń atym Qoja» filminde basty ról oinaǵan akter Nurlan Segizbaevtan pikir alyp, jańa filmge kózqarasyn bildi.
Nurlan Segizbaev bul filmdi baiaǵyda túsirý kerek bolǵan deidi. Qazir ýaqyt basqa, Qazaqstan da jańa el, sondyqtan onyń keiipkerleri de jańarýy tiis.
«Film avtorlary maǵan kelip, stsenariiin jetildirýde kómek surady. Materialdary óte jaqsy, pozitivti, kóńildi. Meniń oiymsha, jańa film halyqqa unaidy. Keshe film avtorlary maǵan kelip, prokat aldynda batamdy alǵysy keldi. Men olarǵa sáttilik tilep, bul obrazdyń kúshi nede ekenin túsindirdim. Bul – bizdiń zamanymyzdyń qaharmany, al ol ómirsheń, shynaiy bolýy tiis. Filmniń jańa dáýirde óz bolashaǵy bar. Halyq ony qabyldaidy dep senemin», - deidi Nurlan Segizbaev.
Shyntýaitynda ózi de filmde boi kórsetetin jasyrmady.
«Bul filmde bir qupiia bar. Sońǵy kadrda jazýshy óz shyǵarmasyn aiaqtap jatady. Kamera jaqyndap kelip, jazýshynyń júzine toqtaidy. Ol jazýshy – men! Bul metafora: men, qartaiǵan Qoja, jańa qaharman týraly jańa oqiǵany jazyp shyqtym. Keiin túsirilim toby maǵan qymbat shapan kigizip, syilyqtar berip, banketke shaqyrdy. Men sol banketke qatystym. Maǵan sóz berildi. Mikrofonmen sahnaǵa shyqqanda, búkil zal ornynan turyp, meniń batamdy tik turyp tyńdady. Mine, osyndai qurmet kórsetti», - deidi qart Qoja.
Anara Baýyrjanqyzy
