وڭتٷستٸك كورەيا پرەزيدەنتٸ مۋن چجە ين 18-20 قىركٷيەكتە سولتٷستٸك كورەيادا ٶتەتٸن سامميتكە قاتىسىپ, سولتٷستٸك كورەيا كٶشباسشىسى كيم چەن ىنمەن كەزدەسەدٸ. بۇل تۋرالى پحەنيانعا ساپارىنان كەيٸن سەۋلدە بريفينگ ٶتكٸزگەن پرەزيدەنتتٸڭ ارنايى ەلشٸسٸ مۋن چون ىي يون مەلٸم ەتتٸ, دەپ حابارلايدى قازاقپارات ريونحاپقا سٸلتەمە جاساپ.
چوننىڭ ايتۋىنشا, كورەيا رەسپۋبليكاسى مەن كحدر پحەنياندا ٷشٸنشٸ سامميتتٸ ٶتكٸزۋگە, سونداي-اق كەلەسٸ اپتانىڭ باسىندا اتالمىش سامميت تۋرالى تالقىلاۋ ٷشٸن جوعارى دەڭگەيدەگٸ كەلٸسسٶزدەر ٶتكٸزۋگە كەلٸسكەن.
مۋن چجە ين مەن كيم چەن ىن العاش رەت 27 سەۋٸردە پانمۋندجوم اۋىلىندا كەزدەسكەن ەدٸ. ال ەكٸنشٸ مەرتە 26 مامىردا جٷزدەستٸ.
چوننىڭ مەلٸمدەۋٸنشە, الداعى سامميتتە ەكٸ ەل باسشىلارىنىڭ پانمۋندجومداعى بٸرٸنشٸ كەزدەسۋٸندە قول جەتكٸزٸلگەن جوعارى دەڭگەيدەگٸ كورەياارالىق كەلٸسٸمدەردٸڭ جٷزەگە اسىرىلۋ بارىسى قارالادى.
باسپاسٶز مەسليحاتىندا اتاپ ٶتٸلگەندەي, سولتٷستٸك كورەيا كٶشباسشىسى كورەيا تٷبەگٸن تولىقتاي يادرولىق قارۋسىزداندىرۋعا ۇستامدىلىعىن راستاپ, وڭتٷستٸك كورەيامەن عانا ەمەس, سونداي-اق قۇراما شتاتتارمەن تىعىز ىنتىماقتاستىق جاساۋعا دايىن ەكەندٸگٸن جەتكٸزگەن.
مەملەكەت باسشىلارى سامميت بارىسىندا, سونداي-اق سەۋل مەن پحەنيان اراسىنداعى ەسكەري شيەلەنٸستٸ ودان ەرٸ تٶمەندەتۋ جولدارىن تالقىلاماق.
«ەكٸ ەل ٶزارا سەنٸمدٸ نىعايتۋدىڭ ناقتى جولدارى مەن قارۋلى قاقتىعىستاردىڭ الدىن الۋدى تالقىلاۋعا كەلٸستٸ», - دەدٸ چون.
وسى ماقساتتا تاراپتار ٷشٸنشٸ سامميت باستالعانعا دەيٸن كەسون قالاسىندا بٸرلەسكەن بايلانىس بٶلٸمدەرٸن اشۋعا ۋاعدالاسقان.
