Ońtústik Koreia prezidenti Mýn Chje In 18-20 qyrkúiekte Soltústik Koreiada ótetin sammitke qatysyp, Soltústik Koreia kóshbasshysy Kim Chen Ynmen kezdesedi. Bul týraly Phenianǵa saparynan keiin Seýlde brifing ótkizgen prezidenttiń arnaiy elshisi Mýn Chon Yi Ion málim etti, dep habarlaidy QazAqparat Rionhapqa silteme jasap.
Chonnyń aitýynsha, Koreia Respýblikasy men KHDR Phenianda úshinshi sammitti ótkizýge, sondai-aq kelesi aptanyń basynda atalmysh sammit týraly talqylaý úshin joǵary deńgeidegi kelissózder ótkizýge kelisken.
Mýn Chje In men Kim Chen Yn alǵash ret 27 sáýirde Panmýndjom aýylynda kezdesken edi. Al ekinshi márte 26 mamyrda júzdesti.
Chonnyń málimdeýinshe, aldaǵy sammitte eki el basshylarynyń Panmýndjomdaǵy birinshi kezdesýinde qol jetkizilgen joǵary deńgeidegi koreiaaralyq kelisimderdiń júzege asyrylý barysy qaralady.
Baspasóz máslihatynda atap ótilgendei, Soltústik Koreia kóshbasshysy Koreia túbegin tolyqtai iadrolyq qarýsyzdandyrýǵa ustamdylyǵyn rastap, Ońtústik Koreiamen ǵana emes, sondai-aq Qurama Shtattarmen tyǵyz yntymaqtastyq jasaýǵa daiyn ekendigin jetkizgen.
Memleket basshylary sammit barysynda, sondai-aq Seýl men Phenian arasyndaǵy áskeri shielenisti odan ári tómendetý joldaryn talqylamaq.
«Eki el ózara senimdi nyǵaitýdyń naqty joldary men qarýly qaqtyǵystardyń aldyn alýdy talqylaýǵa kelisti», - dedi Chon.
Osy maqsatta taraptar úshinshi sammit bastalǵanǵa deiin Keson qalasynda birlesken bailanys bólimderin ashýǵa ýaǵdalasqan.
