ليۆان استاناسى بەيرۋت قالاسىندا 4 تامىزدا جەرگٸلٸكتٸ ۋاقىت بويىنشا كەشكٸ التى شاماسىندا تەڭٸز پورتىندا ٷلكەن جارىلىس بولدى. ەل-جازيرا تەلەارناسىنىڭ حابارلاۋىنشا, ەل بيلٸگٸ كەم دەگەندە 27 ادامنىڭ قايتىس بولعانىن, 2500 ادامنىڭ جارالانعانىن ايتقان.
ەلدٸڭ دەنساۋلىق ساقتاۋ مينيسترلٸگٸ قازا تاپقاندار سانى ٶسۋٸ مٷمكٸن دەپ مەلٸمدەدٸ. ەلدە 5 تامىز قارالى كٷن دەپ جارييالاندى.
جارىلىستان كٶپتەگەن عيمارات قيراعان. كٶشەدە اۋدارىلعان كٶلٸكتەر, شاعىلعان تەرەزەلەر, كٸرپٸش, تاستار جاتىر. قالادا اۆتوكٶلٸك قوزعالىسى دا بۇزىلدى. قالا اۋرۋحانالارىنا جارالانعاندار كٶپتەپ تٷسٸپ, سىيماي جاتىر.
CNN تەلەارناسىنىڭ تٸلشٸسٸنٸڭ حابارلاۋىنشا, جارىلىس ايماعىنان بٸرنەشە شاقىرىم جەردەگٸ ٷيلەردٸڭ دە تەرەزەسٸ سىنعان. تٸلشٸلەردٸڭ سٶزٸنشە, CNN ارناسىنىڭ بەيرۋتتاعى بيۋروسىندا جارىلىس "جەر سٸلكٸنٸسٸندەي" سەزٸلگەن.
جارىلىستىڭ سەبەبٸ بەلگٸسٸز. ەل ٷكٸمەتٸ تەڭٸز پورتىنداعى قويمادا جارىلعىش زات جارىلعانىن ايتادى.
ايتا كەتەيٸك, قازاقستان سىرتقى ٸستەر مينيسترلٸگٸ جارىلىس تولقىنىنان قازاقستاننىڭ ليۆانداعى ەلشٸلٸگٸنٸڭ عيماراتى زاقىمدانعانىن حابارلادى.
"ەلشٸلٸك قىزمەتكەرلەرٸ جۇمىس ۋاقىتى اياقتالعان سوڭ ٷيلەرٸنە قايتىپ كەتكەن. جۇمىستا قالعان كونسۋل جارىلىس تولقىنىنان ازداپ جاراقاتتاندى. سٸم جەرگٸلٸكتٸ بيلٸكپەن بايلانىسىپ وتىر. ليۆاندا جٷرگەن قازاقستان ازاماتتارىنا قاتىستى اقپاراتتاردى تەكسەرٸپ جاتىر" دەپ حابارلادى مينيسترلٸك.
جارىلىس ليۆان ٷشٸن ٶتە قيىن شاقتا بولدى. ەلدە ەكونوميكالىق داعدارىس. بۇعان قوسا, جارىلىس بۇۇ-نىڭ تريبۋنالىندا "10 جىل بۇرىن ليۆاننىڭ ەكس-پرەمەرٸ رافيك حاريريدٸ ٶلتٸردٸ" دەپ ايىپتالعان تٶرت ادامنىڭ سوتى قارساڭىندا بولدى. تٶرت ايىپتالۋشى دا "حەزبوللا" توبىنىڭ مٷشەسٸ. ولار ٶزدەرٸنە تاعىلعان ايىپتى جوققا شىعارادى. سوت شەشٸمٸ جۇما شىعۋى تيٸس.
بەيرۋت قالاسىندا شامامەن 300 مىڭنان 2 ميلليونعا دەيٸن ادام تۇرادى. كەيٸنگٸ 90 جىلدا قالادا حالىق ساناعى ٶتپەگەن.
