Livan astanasy Beirýt qalasynda 4 tamyzda jergilikti ýaqyt boiynsha keshki alty shamasynda teńiz portynda úlken jarylys boldy. Ál-Jazira telearnasynyń habarlaýynsha, el biligi kem degende 27 adamnyń qaitys bolǵanyn, 2500 adamnyń jaralanǵanyn aitqan.
Eldiń densaýlyq saqtaý ministrligi qaza tapqandar sany ósýi múmkin dep málimdedi. Elde 5 tamyz qaraly kún dep jariialandy.
Jarylystan kóptegen ǵimarat qiraǵan. Kóshede aýdarylǵan kólikter, shaǵylǵan terezeler, kirpish, tastar jatyr. Qalada avtokólik qozǵalysy da buzyldy. Qala aýrýhanalaryna jaralanǵandar kóptep túsip, syimai jatyr.
CNN telearnasynyń tilshisiniń habarlaýynsha, jarylys aimaǵynan birneshe shaqyrym jerdegi úilerdiń de terezesi synǵan. Tilshilerdiń sózinshe, CNN arnasynyń Beirýttaǵy biýrosynda jarylys "jer silkinisindei" sezilgen.
Jarylystyń sebebi belgisiz. El úkimeti teńiz portyndaǵy qoimada jarylǵysh zat jarylǵanyn aitady.
Aita keteiik, Qazaqstan syrtqy ister ministrligi jarylys tolqynynan Qazaqstannyń Livandaǵy elshiliginiń ǵimaraty zaqymdanǵanyn habarlady.
"Elshilik qyzmetkerleri jumys ýaqyty aiaqtalǵan soń úilerine qaityp ketken. Jumysta qalǵan konsýl jarylys tolqynynan azdap jaraqattandy. SIM jergilikti bilikpen bailanysyp otyr. Livanda júrgen Qazaqstan azamattaryna qatysty aqparattardy tekserip jatyr" dep habarlady ministrlik.
Jarylys Livan úshin óte qiyn shaqta boldy. Elde ekonomikalyq daǵdarys. Buǵan qosa, jarylys BUU-nyń tribýnalynda "10 jyl buryn Livannyń eks-premeri Rafik Hariridi óltirdi" dep aiyptalǵan tórt adamnyń soty qarsańynda boldy. Tórt aiyptalýshy da "Hezbolla" tobynyń múshesi. Olar ózderine taǵylǵan aiypty joqqa shyǵarady. Sot sheshimi juma shyǵýy tiis.
Beirýt qalasynda shamamen 300 myńnan 2 millionǵa deiin adam turady. Keiingi 90 jylda qalada halyq sanaǵy ótpegen.
