فوتو اشىق دەرەككٶزدەن الىندى
ٸشكٸ ٸستەر مينيسترٸنٸڭ ورىنباسارى يگور لەپەحا وتباسىلىق تيرانداردى ٷيٸنەن قۋىپ شىعۋ تۋرالى باستاماعا تٷسٸنٸكتەمە بەردٸ, دەپ حابارلايدى Sputnik قازاقستان.
ۆەدومستۆو وتباسىندا زورلىق-زومبىلىق جاسايتىن قازاقستاندىقتاردى ٷيٸنەن قۋىپ شىعارۋدى ۇسىنىپ وتىر.
"بٸرٸنشٸدەن, ەشقانداي مەسەلە تۋىنداماس ٷشٸن مۇنداي شەشٸمدٸ سوت قابىلدايدى. ەگەر بۇل نورما قابىلدانسا, ەرينە. نەگٸزٸ قازٸر مۇنداي نورما زاڭنامادا بار. سۋديا كٷش كٶرسەتەتٸن ادامنىڭ باسقا باسپاناسى بار بولعان جاعدايدا عانا وسى شارانى قولدانا الادى. مٸنە, بٸز وسىنى الىپ تاستاعىمىز كەلٸپ وتىر. ياعني ەگەر سۋديا اگرەسسوردى ٷيٸنەن قۋىپ شىعارۋدى اقىلعا قونىمدى دەپ تاپسا, ول ٷيدەن شىعارۋ تۋرالى شەشٸم قابىلدايدى", - دەپ تٷسٸندٸردٸ لەپەحا ٷكٸمەتتە ٶتكەن بريفينگتە.
وسى ورايدا جۋرناليستەر ٷيٸنەن قۋىلعان وتباسىلىق تيراندار باسقا جەردە اگرەسسييا كٶرسەتپەي مە دەپ سۇرادى.
"ەدەتتە وتباسىندا زورلىق-زومبىلىققا باراتىن ادامدار قالعان جاعدايلاردا جاسىق كەلەدٸ, زاڭعا باعىنادى. وسىنداي, مٸنە, پارادوكس. ەگەر باسقا جەردە كٷش قولدانىپ جاتسا, وندا تاعى دا جاۋاپقا تارتامىز", - دەيدٸ ٸشكٸ ٸستەر مينيسترٸنٸڭ ورىنباسارى.
