بٷگٸن كاسپيي ماڭى مەملەكەتتەرٸنٸڭ بەسٸنشٸ سامميتٸندە بەس ەلدٸڭ اراسىندا بٸرقاتار قۇجاتتارعا قول قويىلدى, دەپ حابارلايدى Baq.kz اقپارات اگەنتتٸگٸ.
بٸرٸنشٸدەن, كاسپيي تەڭٸزٸندە لاڭكەستٸكپەن كٷرەس سالاسىندا ىنتىماقتاستىق تۋرالى حاتتاما بەكٸتٸلدٸ. بۇل قۇجاتقا قازاقستان تاراپىنان قر سىرتقى ٸستەر مينيسترٸ قايرات ەبرٸراحمانوۆ قول قويدى.
ەكٸنشٸ قۇجاتتى, ياعني كاسپيي تەڭٸزٸندە ۇيىمداسقان قىلمىسپەن كٷرەس سالاسىنداعى ىنتىماقتاستىق تۋرالى حاتتامانى بەس ەلدٸڭ ٸشكٸ ٸستەر مينيسترلەرٸ بەكٸتتٸ. وعان قوسا, بەس ەلدٸڭ ٶكٸلدەرٸ شەكارالىق ۆەدومستۆولاردىڭ ىنتىماقتاستىعى مەن ٶزارا ٸس-قيمىلى تۋرالى حاتتاماعا قول قويدى.
بۇدان باسقا, سامميت اياسىندا كاسپيي ماڭى مەملەكەتتەرٸنٸڭ ٷكٸمەتتەرٸ اراسىندا ساۋدا-ەكونوميكالىق ىنتىماقتاستىق تۋرالى كەلٸسٸم جاسالدى.
قول قويىلعان كەلەسٸ كەلٸسٸم كاسپيي ماڭى مەملەكەتتەرٸنٸڭ ٷكٸمەتتەرٸ اراسىنداعى كٶلٸك سالاسى بويىنشا ىنتىماقتاستىققا ارنالدى.
سونىمەن قاتار, كاسپيي تەڭٸزٸندە جانجالداردى بولدىرماۋ جٶنٸندەگٸ كەلٸسٸم بەكٸتٸلدٸ. وسى قۇجاتقا قازاقستان جاعىنان قر قورعانىس مينيسترٸ نۇرلان ەرمەكباەۆ قول قويدى.
ەستەرٸڭٸزگە سالا كەتەيٸك, بۇعان دەيٸن اقتاۋ سامميتٸنە قاتىسقان بەس ەلدٸڭ باسشىلارى كاسپييدٸڭ قۇقىقتىق مەرتەبەسٸ تۋرالى كونۆەنتسيياعا قول قويدى.
