قر ەدٸلەت مينيسترٸ مارات بەكەتاەۆ قازاق تٸلٸن جەتٸك مەڭگەرۋ ٷشٸن ساباق الىپ جٷرگەنٸن ايتتى. بۇل تۋرالى قازاقپارات جازدى.
اتاپ ايتقاندا, بٷگٸن مەجٸلٸستە «قازاقستان رەسپۋبليكاسىنىڭ كەيبٸر كونستيتۋتسييالىق زاڭدارىنا ٶزگەرٸستەر مەن تولىقتىرۋلار ەنگٸزۋ تۋرالى» قر كونستيتۋتسييالىق زاڭ جوباسى تانىستىرىلعاننان كەيٸن ەدٸلەت مينيسترٸ تٸلشٸلەردٸڭ بٸرقاتار سۇراقتارىنا جاۋاپ بەردٸ. سونىڭ بٸرٸ مينيستردٸڭ مەملەكەتتٸك تٸلدٸ تولىق مەڭگەرۋٸنە قاتىستى بولدى.
«سٸز قازاق تٸلٸندە ەركٸن سٶيلەۋ ٷشٸن ٶزٸڭٸزدٸ جەتٸلدٸرٸپ, ساباق الىپ جاتسىز با? بٸزگە قاشان مەملەكەتتٸك تٸلدە تولىق جاۋاپ بەرەسٸز?»,- دەپ سۇرادى تٸلشٸلەر ۆەدومستۆو باسشىسى بەكەتاەۆتان.
«بٸر جىلدىڭ ٸشٸندە تولىق مەڭگەرٸپ شىعامىن. قازٸر اپتاسىنا ٷش رەت ساباق الىپ جٷرمٸن. اۋىلعا بارعان كەزدە تۇرعىندارمەن, تۋىستارىممەن تەك قازاقشا سٶيلەسەمٸن. بۇل باعىتتا جاقسى تەجٸريبە الىپ جاتىرمىن», - دەدٸ مينيستر.
ەستەرٸڭٸزگە سالا كەتەيٸك, بيىل قاڭتار ايىندا پارلامەنت مەجٸلٸسٸنٸڭ جالپى وتىرىسى بارىسىندا تٸلشٸلەر ساۋالىنا جاۋاپ بەرگەن قر ۇلتتىق ەكونوميكا مينيسترٸ تيمۋر سٷلەيمەنوۆ تاياۋ ۋاقىتتا قازاق تٸلٸندە جەتٸك سٶيلەيتٸنٸن ايتقان بولاتىن.
جاڭادان تاعايىندالعان مينيستر جۋرناليستەرگە سۇحباتى بارىسىندا مەسكەۋدە جۇمىس ٸستەگەن جىلدار ٸشٸندە قازاق تٸلٸن ۇمىتىڭقىراعانىن جەتكٸزگەن ەدٸ. «مەسكەۋدە 5 جىلعى قىزمەتٸم بارىسىندا ٶز انا تٸلٸمدٸ ۇمىتىپپىن. بٸراق تا, التى ايدىڭ ٸشٸندە قايتا مەڭگەرٸپ شىعامىن», - دەدٸ سٷلەيمەنوۆ.
