QR Ádilet ministri Marat Beketaev qazaq tilin jetik meńgerý úshin sabaq alyp júrgenin aitty. Bul týraly QazAqparat jazdy.
Atap aitqanda, búgin Májiliste «Qazaqstan Respýblikasynyń keibir konstitýtsiialyq zańdaryna ózgerister men tolyqtyrýlar engizý týraly» QR Konstitýtsiialyq zań jobasy tanystyrylǵannan keiin Ádilet ministri tilshilerdiń birqatar suraqtaryna jaýap berdi. Sonyń biri ministrdiń memlekettik tildi tolyq meńgerýine qatysty boldy.
«Siz qazaq tilinde erkin sóileý úshin ózińizdi jetildirip, sabaq alyp jatsyz ba? Bizge qashan memlekettik tilde tolyq jaýap beresiz?»,- dep surady tilshiler vedomstvo basshysy Beketaevtan.
«Bir jyldyń ishinde tolyq meńgerip shyǵamyn. Qazir aptasyna úsh ret sabaq alyp júrmin. Aýylǵa barǵan kezde turǵyndarmen, týystarymmen tek qazaqsha sóilesemin. Bul baǵytta jaqsy tájiribe alyp jatyrmyn», - dedi ministr.
Esterińizge sala keteiik, biyl qańtar aiynda Parlament Májilisiniń jalpy otyrysy barysynda tilshiler saýalyna jaýap bergen QR Ulttyq ekonomika ministri Timýr Súleimenov taiaý ýaqytta qazaq tilinde jetik sóileitinin aitqan bolatyn.
Jańadan taǵaiyndalǵan ministr jýrnalisterge suhbaty barysynda Máskeýde jumys istegen jyldar ishinde qazaq tilin umytyńqyraǵanyn jetkizgen edi. «Máskeýde 5 jylǵy qyzmetim barysynda óz ana tilimdi umytyppyn. Biraq ta, alty aidyń ishinde qaita meńgerip shyǵamyn», - dedi Súleimenov.
