فوتو: Ticketon.kz
مەدەنيەت جەنە اقپارات مينيسترلٸگٸ حالىقارالىق مۋزەيلەر كٷنٸنە وراي قازاقستانداعى مۋزەي سالاسىنىڭ نەگٸزگٸ كٶرسەتكٸشتەرٸ مەن جەتٸستٸكتەرٸن ۇسىندى, دەپ حابارلايدى Ult.kz.
قازاقستاندا 286 مۋزەي جۇمىس ٸستەيدٸ. ولاردىڭ قورىندا 4,5 ميلليوننان استام جەدٸگەر ساقتالعان, ال مۋزەيلەرگە جىل سايىن 6,5 ميلليوننان استام ادام كەلەدٸ.
تەك ٶتكەن جىلدىڭ ٶزٸندە رەسپۋبليكالىق مۋزەيلەر 1,5 مىڭنان استام ٸس-شارا ۇيىمداستىردى. ونىڭ ٸشٸندە 187 كٶرمە ٶتٸپ, ولاردى 800 مىڭعا جۋىق ادام تاماشالادى. الماتىداعى ۇلتتىق ورتالىق مۋزەيدە «التىن وردا» زالى اشىلىپ, «قازاقستاننىڭ تەۋەلسٸزدٸگٸ» زالىنىڭ رەەكسپوزيتسيياسى جٷرگٸزٸلدٸ. مۇنداي جوبالار قازاقستان تاريحىنىڭ ماڭىزدى كەزەڭدەرٸن جاڭاشا تانىتىپ, ونىڭ مازمۇنىن تەرەڭٸرەك اشۋعا مٷمكٸندٸك بەرەدٸ.
مۋزەي سالاسىن تسيفرلاندىرۋدىڭ دا ماڭىزى ەرەكشە. بۇل جۇمىس مۋزەيلەرمەن قاتار مۋزەي-قورىقتاردا دا جٷيەلٸ تٷردە جٷزەگە اسىپ جاتىر. قازٸردٸڭ ٶزٸندە كەلۋشٸلەرگە ىڭعايلى ەرٸ زاماناۋي قىزمەت كٶرسەتۋگە مٷمكٸندٸك بەرەتٸن ەلەكتروندى كٸرۋ جٷيەسٸ ەنگٸزٸلدٸ. سونىمەن بٸرگە E-museum بٸرىڭعاي تسيفرلىق كەڭٸستٸگٸ دامىپ كەلەدٸ. بۇل جٷيەگە ەلٸمٸزدٸڭ بارلىق 20 ٶڭٸرٸنەن 284 مۋزەي قوسىلدى. تسيفرلىق كاتالوگقا مۋزەي قورىنىڭ 66 مىڭنان استام بٸرلٸگٸ ەنگٸزٸلٸپ, 750 ٷشٶلشەمدٸ مودەل جاسالدى, 15 ۆيرتۋالدى تۋر قولجەتٸمدٸ بولدى.
"مەملەكەت باسشىسىنىڭ باستاماسىمەن تاريحي سانانى جاڭعىرتۋعا, مەدەني مۇرانى ساقتاۋعا جەنە ونى بولاشاق ۇرپاققا جەتكٸزۋگە ايرىقشا كٶڭٸل بٶلٸنٸپ كەلەدٸ. جاڭا كونستيتۋتسييامىزدىڭ قۇندىلىقتار جٷيەسٸندە مەدەنيەت, بٸلٸم, عىلىم جەنە يننوۆاتسييا ادام كاپيتالىن دامىتۋ مەن جاسامپاز قوعام قالىپتاستىرۋدىڭ ماڭىزدى نەگٸزدەرٸ رەتٸندە ەرەكشە مەنگە يە بولدى. سوندىقتان قازٸرگٸ مۋزەي – مۇرانى ساقتايتىن ورىن عانا ەمەس, تەربيە, اعارتۋ جەنە ۇلتتىق بولمىستى نىعايتۋ ٸسٸنٸڭ ماڭىزدى ارقاۋى", - دەپ اتاپ ٶتتٸ قر مەدەنيەت جەنە اقپارات مينيسترٸ ايدا بالاەۆا.
ەسكە سالايىق, بٷگٸن كەشكە ەلٸمٸزدٸڭ بارلىق ٶڭٸرٸندە دەستٷرلٸ «مۋزەيلەر تٷنٸ» اكتسيياسى ٶتەدٸ. قازاقستاننىڭ مۋزەيلەرٸ مەن مۋزەي-قورىقتارى كەلۋشٸلەرگە ەسٸگٸن ەرەكشە فورماتتا اشىپ, كەشكٸ ەكسكۋرسييالار, كٶرمەلەر, ينتەراكتيۆتٸ باعدارلامالار, شىعارماشىلىق كەزدەسۋلەر مەن مەدەني-اعارتۋشىلىق ٸس-شارالار ۇسىنادى.
