Foto: Ticketon.kz
Mádeniet jáne aqparat ministrligi Halyqaralyq mýzeiler kúnine orai Qazaqstandaǵy mýzei salasynyń negizgi kórsetkishteri men jetistikterin usyndy, dep habarlaidy Ult.kz.
Qazaqstanda 286 mýzei jumys isteidi. Olardyń qorynda 4,5 millionnan astam jádiger saqtalǵan, al mýzeilerge jyl saiyn 6,5 millionnan astam adam keledi.
Tek ótken jyldyń ózinde respýblikalyq mýzeiler 1,5 myńnan astam is-shara uiymdastyrdy. Onyń ishinde 187 kórme ótip, olardy 800 myńǵa jýyq adam tamashalady. Almatydaǵy Ulttyq ortalyq mýzeide «Altyn Orda» zaly ashylyp, «Qazaqstannyń Táýelsizdigi» zalynyń reekspozitsiiasy júrgizildi. Mundai jobalar Qazaqstan tarihynyń mańyzdy kezeńderin jańasha tanytyp, onyń mazmunyn tereńirek ashýǵa múmkindik beredi.
Mýzei salasyn tsifrlandyrýdyń da mańyzy erekshe. Bul jumys mýzeilermen qatar mýzei-qoryqtarda da júieli túrde júzege asyp jatyr. Qazirdiń ózinde kelýshilerge yńǵaily ári zamanaýi qyzmet kórsetýge múmkindik beretin elektrondy kirý júiesi engizildi. Sonymen birge E-museum biryńǵai tsifrlyq keńistigi damyp keledi. Bul júiege elimizdiń barlyq 20 óńirinen 284 mýzei qosyldy. Tsifrlyq katalogqa mýzei qorynyń 66 myńnan astam birligi engizilip, 750 úshólshemdi model jasaldy, 15 virtýaldy týr qoljetimdi boldy.
"Memleket basshysynyń bastamasymen tarihi sanany jańǵyrtýǵa, mádeni murany saqtaýǵa jáne ony bolashaq urpaqqa jetkizýge airyqsha kóńil bólinip keledi. Jańa Konstitýtsiiamyzdyń qundylyqtar júiesinde mádeniet, bilim, ǵylym jáne innovatsiia adam kapitalyn damytý men jasampaz qoǵam qalyptastyrýdyń mańyzdy negizderi retinde erekshe mánge ie boldy. Sondyqtan qazirgi mýzei – murany saqtaityn oryn ǵana emes, tárbie, aǵartý jáne ulttyq bolmysty nyǵaitý isiniń mańyzdy arqaýy", - dep atap ótti QR Mádeniet jáne aqparat ministri Aida Balaeva.
Eske salaiyq, búgin keshke elimizdiń barlyq óńirinde dástúrli «Mýzeiler túni» aktsiiasy ótedi. Qazaqstannyń mýzeileri men mýzei-qoryqtary kelýshilerge esigin erekshe formatta ashyp, keshki ekskýrsiialar, kórmeler, interaktivti baǵdarlamalar, shyǵarmashylyq kezdesýler men mádeni-aǵartýshylyq is-sharalar usynady.
