Qorǵanys jáne aeroǵarysh ónerkásibi ministri Beibit Atamqulov Qaraǵandy oblysynda zymyran qulaǵannan keiin shyqqan órt úshin Reseidiń ótemaqy tólemeitinin aitty, - dep habarlaidy "Ult aqparat" kaz.tengrinews.kz portalyna silteme jasap.
"Órtti sóndirýge baǵyttalǵan jumystardyń barlyǵy jasaldy. Sizder mundai jaǵdailardyń jylyna 2-3 ret bolatynyn eskermei otyrsyzdar. Onymen qosa, órt shóleitti aýmaqta boldy, kún óte ystyq. Órtti sóndirýge qatysty sharalarǵa ketken shyǵyndy reseilik tarap aldy. Olar barlyq shyǵyndy tolyqtai japty", - dedi ministr.
Atamqulovtyń aitýynsha, Qazaqstan órt úshin ótemaqy talap etpeidi.
"Ol jaqta tek shóp órtenip ketti", - dedi ministr.
Beibit Atamqulov tótenshe jaǵdaidan qaza tapqan er adamnyń otbasyna jáne zardap shekkenderge qandai ótemaqy beriletinin naqtylamady.
"Roskosmos" ókilderi kórsetetin kómektiń somasy ázirshe talqylanyp jatyr, ony aita almaimyn. Ol Resei Federatsiiasynyń biýdjeti ǵoi. Kómektiń barlyǵyn reseilik tarap kórsetedi, sebebi qaza tapqan er adam reseilik kásiporynnyń jumysshysy bolyp sanalady. Sol jaqtan jalaqy alyp júrdi, saqtandyrýy jáne taǵy basqasy", - dedi ministr.
Eske sala keteiik, 14 maýsymda keshki ýaqytta qoldanýshylar WhatsApp messendjeri arqyly Jezqazǵan mańyndaǵy Talap aýylyna zymyran qulaǵany týraly habar taratqan bolatyn. Habarlamada qirandyda geptil (adam ómirine óte qaýipti himiialyq ýly zat) bar delindi. Aýyl turǵyndaryna esik pen terezelerdi jabý kerektigi jáne balalardy kóshege shyǵarmaý týraly eskertý jasalǵan bolatyn. Sondai-aq, osyǵan deiin Jezqazǵan mańyna qulaǵan zymyran qirandysynda qaterli geptil joq ekeni aitylǵan edi.
Sonymen qatar, zymyran qirandysy qulaǵan jerde bir adamnyń qaza tapqany jaily habarlanǵan bolatyn. Al keiinirek Roskosmos Jezqazǵan mańyndaǵy qaiǵyly oqiǵaǵa bailanysty pikir bildirgen edi. Olardyń aitýynsha, órtke qatty soqqan jel sebep bolǵan. "Aýyr meteojaǵdailarǵa bailanysty halyq turmaityn aýmaqta órt shyqty. Adamdarǵa esh qaýip tónip turǵan joq, órt sóndirildi", - degen edi Roskosmos ókilderi.
