Qazaq ázil-ospaq óneriniń kórnekti ókili, tanymal akter Júsip Aqshoraǵa «Halyqtyń súiikti ártisi» atty arnaiy medal tabystaldy, dep habarlaidy ult.kz.
Aita keteiik, bul marapat memlekettik nagrada mártebesine ie emes. Arnaiy medal «Intelligentno Qu» jobasy aiasynda jas ázilkeshter men qazaqtildi kontent avtorlarynyń bastamasymen ázirlengen.
Uiymdastyrýshylar akterdiń otandyq iýmor men sahna óneriniń damýyna qosqan úlesin atap ótip, oǵan halyq atynan arnaiy medal men kýálik tabystady. Sondai-aq qazaqy dástúrge sai óner iesiniń iyǵyna aq shapan japty.
Óz kezeginde Júsip Aqshora jas áriptesteriniń qurmetine rizashylyǵyn bildirdi. Akter ónerdegi sabaqtastyqtyń, aǵa býynǵa qurmet kórsetýdiń jáne keiingi urpaqqa jol silteýdiń mańyzyn atap ótti.
Júsip Aqshora kórermenge «Shanshar» ázil-ospaq teatry arqyly keńinen tanylǵan. Ol sahnada túrli keiipkerlerdi somdap, ózindik ázil mánerimen qazaq iýmorynyń qalyptasýy men damýyna eleýli úles qosty.
