Shymkentte bolǵan jol-kólik oqiǵasy saldarynan eki adam aýyr jaraqat alyp, jansaqtaý bólimine tústi. Apattan keiin avtokólik órtenip ketken, dep habarlaidy ult.kz.
Qalalyq tótenshe jaǵdailar departamentiniń málimetinshe, oqiǵa ornyna jedel jetken qutqarýshylar kóliktiń tolyqtai otqa oranǵanyn anyqtap, órtti sóndirgen.
«Jol-kólik oqiǵasy saldarynan zardap shekken eki adam jedel meditsinalyq kómek qyzmetiniń mamandaryna tapsyryldy. Eki naýqastyń da jaǵdaiy aýyr», – dep habarlady vedomstvo.
Aldyn ala málimet boiynsha, júrgizýshi kólikti basqara almai qalyp, dúken ǵimaratyna soǵylǵan. Soqqydan keiin avtokólik órtengen.
Oqiǵaǵa qatysty qylmystyq is qozǵaldy. Politsiia qyzmetkerleri apattyń barlyq mán-jaiyn anyqtaý úshin tergeý jumystaryn júrgizip jatyr.
Qalalyq densaýlyq saqtaý basqarmasynyń málimetinshe, jol apatynan zardap shekken eki adam №1 qalalyq klinikalyq aýrýhananyń jansaqtaý bóliminde jatyr.
