Astanadan shyqqan jolaýshylar poiyzynda qaiǵyly oqiǵa boldy. Júregine ota jasatqan er adam jubaiymen birge saparlap kele jatyp, jol ústinde kóz jumdy, dep habarlaidy ult.kz.
Áleýmettik jelilerde Astana–Qostanai baǵytynda qatynaityn «Sary-Arqa Kompani» JShS-ne tiesili poiyzda jolaýshynyń qaitys bolǵany týraly aqparat taraǵan. Kompaniia bul derekti rastap, oqiǵanyń mán-jaiyn túsindirdi.
Tasymaldaýshynyń málimetinshe, oqiǵa 14 maýsym kúni keshke «Nurly jol – Oral» baǵytyndaǵy №57 jolaýshylar poiyzynda bolǵan. Býrabai kýrorty stantsiiasyna jaqyndaǵan sátte №19 vagondaǵy jolaýshynyń densaýlyǵy kenetten nasharlaǵan.
Jolserik jaǵdai týraly poiyz bastyǵyna habarlap, lokomotiv mashinisi arqyly shuǵyl túrde jedel járdem shaqyrylǵan.
Kompaniianyń habarlaýynsha, er adam 54 jastaǵy jubaiymen birge saparǵa shyqqan. Áieliniń aitýynsha, kúieýi júregine jasalǵan operatsiiadan keiin klinikadan qaityp kele jatqan.
Jedel járdem qyzmetkerleri Býrabai kýrorty stantsiiasynda saǵat 23:49-da poiyzǵa kóterilip, naýqasqa alǵashqy meditsinalyq kómek kórsetken. Alaida kóp uzamai er adam esinen tanyp qalǵan. Dárigerler saǵat 00:30-da onyń qaitys bolǵanyn tirkedi. Marqum 23 maýsym kúni 56 jasqa tolýy tiis bolǵan.
Qazirgi ýaqytta ólimniń naqty sebebi jariialanǵan joq. Áleýmettik jelilerde júrek talmasy týraly boljamdar aitylǵanymen, kompaniia bul aqparatty rastaǵan joq.
Oqiǵadan keiin marqumnyń denesi sot-meditsinalyq saraptama júrgizý úshin Kókshetaý stantsiiasynda poiyzdan túsirildi. Tasymaldaýshynyń málimetinshe, oqiǵa boiynsha tiisti akt rásimdelip, barlyq jaýapty qyzmetkerlerdiń túsiniktemeleri alynǵan.
Meditsinalyq jáne tergeý sharalaryna bailanysty poiyz kesteden 43 minýtqa keshigip qozǵalǵan. Ólimniń naqty sebebi saraptama qorytyndysynan keiin belgili bolady.
