Qazaqstanda jumysynan aiyrylǵan azamattarǵa beriletin áleýmettik tólemniń merzimi qysqarady, dep habarlaidy ult.kz.
Eńbek jáne halyqty áleýmettik qorǵaý ministrliginiń málimetinshe, qazir mindetti áleýmettik saqtandyrý júiesine qatysqan jáne talaptarǵa sai azamattarǵa jumysynan aiyrylýyna bailanysty áleýmettik tólem 1 aidan 6 aiǵa deiin taǵaiyndalady. Onyń naqty merzimi áleýmettik saqtandyrý júiesine qatysý ótiline qarai belgilenedi.
Alaida 1 qazannan keiin áleýmettik tólem eń kóbi 3 aiǵa ǵana beriledi. Tólem mólsheri azamattyń ortasha ailyq tabysy men áleýmettik saqtandyrý júiesine qatysý ótiline bailanysty esepteledi.
Qoldanystaǵy tártip boiynsha tólem mólsheri sońǵy 24 aidaǵy áleýmettik aýdarymdar eskerilgen ortasha ailyq tabystyń 45 paiyzyn quraidy.
Sonymen qatar jańa erejege sáikes tólemniń eń joǵary mólsherine shekteý qoiylady. Ol jeti eń tómengi jalaqynyń 45 paiyzynan aspaýǵa tiis.
Áleýmettik tólem alý úshin azamat aldymen jumys izdeýshi retinde tirkelip, keiin jumyssyz mártebesin alýy qajet. Tólem jumyssyz mártebesi berilgen kúnnen bastap taǵaiyndalady.
Eger azamat usynylǵan jumystyń úsh nusqasynan sebepsiz bas tartsa, onyń jumyssyz mártebesi toqtatylyp, áleýmettik tólem de berilmeidi.
