Astanada shetel azamattaryna jeke sáikestendirý nómirin (JSN) zańsyz rásimdeý shemasy áshkerelendi. Bul týraly Qarjylyq monitoring agenttigi málimdedi, dep habarlaidy ult.kz.
Tergeý málimetinshe, 2024–2025 jyldary shetel azamattaryna Qazaqstanǵa kelmei-aq jáne mindetti biometriialyq sáikestendirýden ótpei JSN alýǵa kómektesken zańsyz shema jumys istegen.
Qoldanystaǵy zańnamaǵa sáikes, shetel azamattaryna JSN tek olardyń Qazaqstan aýmaǵynda jeke qatysýy jáne biometriialyq tekserýden ótýi arqyly beriledi.
QMA málimetinshe, zańsyz qyzmetti uiymdastyrýshylar áleýmettik jelidegi arnaiy arna arqyly JSN-dy qashyqtan alýǵa múddeli shetel azamattaryn izdep, tartqan.
Shemaǵa «Azamattarǵa arnalǵan úkimet» memlekettik korporatsiiasynyń Astana qalasyndaǵy filialynyń qyzmetkerleri de qatysqan. Olar HQKO aqparattyq júiesine jalǵan málimetter engizip, JSN alýǵa qatysty jalǵan ótinimder rásimdegen.
Zańsyz qyzmet úshin tólengen qarajat deldaldar arqyly bank aýdarymdarymen qabyldanyp, keiin qatysýshylar arasynda bólingen.
Atalǵan qylmystyq is sotqa joldandy. Tergeý múddesine bailanysty ózge aqparat jariia etilmeidi.
Osy oraida Astanada shetel azamattaryna JSN - dy zańsyz rásimdeý shemasynyń áshkerelenýine qatysty «Azamattarǵa arnalǵan úkimet» Memlekettik korporatsiiasy málimdeme jasady.
"2025 jyly Memlekettik korporatsiia shetel azamattaryna JSN rásimdeý barysynda belgilengen tártiptiń saqtalmaýyna bailanysty jekelegen faktilerdi óz kúshimen anyqtady. Atalǵan jaǵdai boiynsha dereý qyzmettik tekserý júrgizilip, onyń nátijesinde zańbuzýshylyqtar rastaldy. Tekserý qorytyndysy boiynsha materialdar Qazaqstan Respýblikasynyń zańnamasyna sáikes tiisti protsestik sheshimder qabyldaý úshin quqyq qorǵaý organdaryna joldandy.
Osy tusta, Memlekettik korporatsiia mundai jaǵdailardy boldyrmaýǵa baǵyttalǵan birqatar júieli sharalardy iske asyrǵanyn jetkizemiz.
Atap aitqanda, Halyqqa qyzmet kórsetý ortalyqtarynyń aqparattyq júiesi (HQKO IAJ) shetel azamattarynyń memlekettik shekarany kesip ótkeni týraly málimetterdi, onyń ishinde olardyń sáikestendirý derekterin alýǵa múmkindik beretin «Berkýt» biryńǵai aqparattyq júiesimen integratsiialandy. Sonyń nátijesinde shetel azamatynyń Qazaqstan Respýblikasynyń aýmaǵynda ekenin rastaityn málimet bolmaǵan jaǵdaida JSN rásimdeýge múmkindik bermeitin avtomattandyrylǵan baqylaý tetigi engizildi. Sonymen qatar «Berkýt» aqparattyq júiesinen kelip túsken ótinish berýshiniń derbes derekterine HQKO qyzmetkerleriniń ózgeris engizý múmkindigi tolyqtai alynyp tastaldy.
Budan bólek, Qazaqstan Respýblikasynyń «Sáikestendirý nómirleriniń ulttyq tizilimderi týraly» Zańyna sáikes ótinish berýshi mindetti túrde jeke kelýin kózdeitin qosymsha baqylaý mehanizmi engizildi.
Memlekettik korporatsiia memlekettik qyzmet kórsetý barysynda oryn alatyn zańbuzýshylyqtardy anyqtaý jáne olardyń jolyn kesý baǵytyndaǵy jumysty turaqty negizde júrgizip keledi. Bul rette Qazaqstan Respýblikasynyń zańnamasyn, ishki reglamentterdi, sondai-aq aqparattyq qaýipsizdik pen derbes derekterdi qorǵaý talaptaryn buzýǵa qatysty múldem tózbeýshilik qaǵidatyn ustanady" delingen habarlamada.
Aita ketý kerek, Memlekettik korporatsiia 2024 jyly óz betinshe anyqtaǵan 90 materialdy, 2025 jyly 91 materialdy, al 2026 jyldyń alǵashqy bes aiynda 23 materialdy quqyq qorǵaý organdaryna joldady.
