Amerikalyq Zoom Video Communications kompaniiasy distribiýtorlaryna Resei men TMD elderiniń memlekettik mekemeleri men kompaniialaryna onlain-konferentsiiasy servisin satýǵa tyiym saldy. "Kommersant" basylymynyń jazýynsha, Zoom Baýman atyndaǵy Máskeý memlekettik tehnikalyq ýniversitetin programmalyq jabdyqtaýmen qamtamasyz etýden bas tartqan Microsoft-tiń sońynan ilespekshi.
Maqala avtory budan birinshi kezekte Zoom qyzmetin qoldanatyn mektepter men joǵary oqý oryndary zardap shegetinin jazady.
Resei men TMD aýmaǵynda Zoom ónimderin taratatyn "RaitKonf" kompaniiasy 31 naýryzda áriptesterine Zoom Video Communications Inc. kompaniiasynyń ózin ónimderdi memlekettik mekemelerge satý quqyǵynan aiyratynyn málimdegen.
2020 jyly kóptegen tutynýshylar qashyqtan jumys istep, oqi bastaǵan kezde video-konferentsiia naryǵy 2,5 mlrd rýblge deiin ósip, Zoom Reseidegi videobailanys boiynsha eń tanymal korporativti serviske ainalǵan. Ekinshi orynda – TrueConf, úshinshi orynda Skype tur.
"Kommersant" basylymy memlekettik satyp alý saitynan 2020 jyly Zoom ónimin paidalaný boiynsha shamamen 40 tenderdi anyqtaǵan. Zoom qyzmetin satyp alǵandar arasynda Máskeý injenerlik-fizika institýty, Resei memlekettik gýmanitarlyq ýniversiteti, Altai memlekettik ýniversiteti jáne taǵy basqa oqý oryndary bar.
Degenmen mamandardyń esebinshe, Zoom kompaniiasynyń túsim kóleminde Resei úlesi 1 paiyzdan aspaidy. Sarapshylar oǵan Resei naryǵynyń kúrdeligi, memleket zańdaryn saqtaý qiyndyǵy siiaqty faktorlar áser etýi múmkin dep sanaidy.
