AQSh-tyń Tehas shtatyndaǵy Laredo qalasynda Cessna Citation Latitude tipti biznes-djet tas jolǵa qulap, artynsha órtke orandy, dep habarlaidy ult.kz.
Apat saldarynan bir adam kóz jumyp, taǵy birneshe adam jaraqat aldy.
Associated Press agenttiginiń habarlaýynsha, NetJets kompaniiasyna tiesili ushaq bortynda alty adam bolǵan. Olardyń biri oqiǵa ornynda qaza tapsa, qalǵan bes jolaýshy túrli jaraqat alyp, aýrýhanaǵa jetkizilgen.
Ushaq Laredo halyqaralyq áýejaiynyń mańynda qulaǵan. Dispetcherler ushý kezinde bortta tehnikalyq aqaý tirkelgenin habarlaǵan. Biraz ýaqyttan keiin áýe kemesimen bailanys úzilip, ushaq Loop 20 tas jolyna qulap túsken.
Kýágerlerdiń aitýynsha, apattan keiin ushaq órtenip, ainaladaǵylar zardap shekkenderdi kabinadan shyǵarýǵa kómektesken. Keibir adamdar terezeni quraldardyń kómegimen syndyrýǵa tyrysqan.
Ushaqtyń bir bóligi jolda kele jatqan kólikke de soǵylǵan. Kóliktegi adamdar aman qalǵanymen, olar da aýrýhanaǵa jetkizildi. Qutqarý jumystaryna qatysqan bes politsiia qyzmetkeri tútinge ýlaný belgilerimen meditsinalyq kómek alǵan.
