Foto: kaz.tengrinews.kz
Energetika ministri Bolat Aqsholaqov Prezidenttiń tapsyrmasymen qurylǵan arnaiy komissiianyń jylý elektr ortalyqtarynyń (JEO) tehnikalyq jai-kúii boiynsha taldaýyn jariialady, dep habarlaidy Sputnik Qazaqstan portaly.
Ministrdiń aitýynsha, búgingi tańda elimizde barlyǵy 37 jylý elektr ortalyǵy jumys istep jatyr. Sonyń ishinde qyzyl aimaqta – 19, sary aimaqta – 11 jáne jasyl aimaqta – 7 JEO tur. Jylý elektr ortalyqtaryn táýekel aimaqtarǵa bólý jáne anyqtaý kezinde tórt ólshemshart eskerildi: jabdyqtyń tozýy, tehnologiialyq aqaýlar, paidalaný merzimi jáne kadr jetispeýshiligi.
"JEO jabdyqtarynyń ortasha tozýy - 66%. Bul rette Oral, Stepnogorsk, Taraz, Qyzylorda, Kentaý qalalarynyń jylý elektr ortalyqtarynyń tozýy 80%-dan asady. Qyzyl aimaqtaǵy JEO úshin kelesi kúzgi-qysqy jylytý maýsymynan ótý kezinde táýekelderdi azaitý úshin negizgi jabdyqqa kúrdeli jóndeý júrgizý, 98 qazandyqty, 54 týrbinany rekonstrýktsiialaý, jańǵyrtý kólemi aiqyndaldy. Benchmarking aiasynda júrgizilgen aldyn ala esepteýler boiynsha atalǵan jumystardy oryndaý úshin 182 mlrd teńge qarjylandyrý qajet", - dedi Aqsholaqov Úkimet otyrysynda.
Elektr jáne jylý energiiasyna bekitilgen tarifterdi eskerip, energiia óndirýshi uiymdardy jóndeý úshin kózdelgen qarajat 93 milliard teńgeni quraidy.
Ministrdiń aitýynsha, qazirgi ýaqytta elektr stantsiialarynyń bekitilgen tarifter aiasynda elektr jáne jylý energiiasyn ótkizýden túsetin kiristeri tolyqqandy jóndeýge jumsalatyn shyǵyndardy ótemeidi. Jetkiliksiz qarjy somasy 88 milliard teńgeni qurap otyr.
Kommýnaldyq jáne kvazimemlekettik menshiktegi 12 jylý elektr ortalyǵy boiynsha joǵaryda atalǵan jumystardy iske asyrý úshin memlekettik biýdjetten, al 22 jeke jylý elektr ortalyǵy boiynsha menshik iesiniń óz qarajaty esebinen qarjylandyrý usynylady.
