Nur-Sultan qalasynyń ákimdigi astanada bir túnde jańbyrdyń jarty ailyq mólsheri jaýǵany týraly málimet taratty, dep habarlaidy "Ult aqparat".
«Qazgidromettiń málimetinshe, maýsynyń 15-nen 16 qaraǵan túni 22 mm jańbyr jaýdy, ailyq mólsher – 37 mm. Bul ailyq mólsherdiń jartysynan kóbi. Qala kóshelerin sý basýyna jol bermeý úshin ákimdik nóserlik káriz qurlysy boiynsha júieli jumys júrgizýde. Mysaly, B.Momyshuly dańǵyly qaladaǵy problemaly ýchaskeniń biri. Atalǵan ýchaskedegi sý basý problemasy biylǵy jazda sheshimin tabady. Kóshede nóserlik kárizdiń magistraldik kollektorynyń qurylysy júrgizilýde. Atalǵan kárizdiń uzyndyǵy shamamen 500 metr. Basy Daýylpaz kóshesinen bastalyp, Elim-ai kóshesine deiin jalǵasady (B.Momyshuly dańǵyly boiynda). Osylaisha aýmaqta jaýyn-shashyn kezinde sý basý máselesi tolyǵymen sheshiledi», - delingen ákimdik taratqan habarlamada.
Sondai-aq «Jastar» shaǵyn aýdanynda (Táshenov jáne Amman kósheleriniń qiylysynda) jetkizýshi kollektorlardy qaita jańartýǵa bailanysty tazartý qondyrǵylarynyń jumysy júrgizilip jatyr. «Jastar» shaǵyn aýdanyndaǵy jańa qondyrǵylardyń qýaty táýligine 42 myń tekshe metrden asady. Bul jaýyn-shashyn kárizderiniń ótkizý qabiletin edáýir jaqsartady.
«Bul tazartý qondyrǵylary Táshenov, Baraev, Ýálihanov, Imanbaev kósheleri men Respýblika dańǵylyndaǵy tasqyn sýdyń aldyn alady. Óitkeni qurylǵy jerastyn ornatylyp, al ústinde gúlzar salyp, shaǵyn sáýlet músinderi ornatyp, kógaldandyrý jumystaryn júrgizý kózdelgen. Qurylysty 2021 jyly aiaqtaý josparlanyp otyr. 2019 jyly jaýyn-shashyn kárizderi máselesi «Myńjyldyq» alleiasy aýdanyndaǵy eki aýmaqta tolyqtai sheshilgen edi», - dep tolyqtyrdy ákimdik.
Jalpy qala ákimdigi sý alyp kete beretin Baýyrjan Momyshuly kóshesindegi problemany osydan eki jyl buryn sheshýge ýáde bergen edi. Áitse de odan beri de «qaiyq júzgen» kósheni taǵy birneshe ret sý basyp qalǵan bolatyn.
Al osy jyldyń mamyrynda dańǵyldaǵy problemanyń sheshimin tapqanyn jariia etip, «endi qaiyq kóshedegi sýǵa júzbeitinine» sendirgen bolatyn.
