Úkimet basshysynyń orynbasary - qarjy ministri Álihan Smaiylov patent negizinde jumys isteitin kásipkerler salyqtan qalai bosatylatynyn túsindirdi, dep habarlaidy "Ult aqparat".
Onyń aitýynsha, búginde patent siiaqty arnaiy salyq rejimimen jumys isteitin kásipkerler jyl sońynda esep-qisapty tapsyryp, salyqty tolyǵymen tólep tastaýǵa mindetti. Al prezidenttiń tapsyrmasy boiynsha osy sanattaǵy biznesmender de úsh jylǵa salyqtan bosatylýy shart.
"Máselen, kelesi jyly jańa patent alý úshin kásipkerler biyl jeltoqsan sońynda esepterin tapsyryp, salyqty tólep qoiýy tiis. Bul - salyq kodeksiniń tapsyrmasy. Memleket basshysy olardy da úsh jylǵa salyq tóleýden bosatýdy tapsyrǵan bolatyn. Osyǵan bailanysty tiisti sheshim qabyldandy. Olar jyldyń sońynda esep-qisapty tapsyrǵanda, "jeke tabys salyǵy" degen jerde "0"-di qoiady. Osylaisha, biyl olar salyq tólemeidi", - dedi Smaiylov Senattyń plenarlyq otyrysynda.
Ministrdiń sózine qaraǵanda, búginde respýblika boiynsha 88 myń kásipker patentpen jumys isteidi. Olardyń jalpy salyǵy 350 million teńgeni quraidy.
Aita keteiik, memleket basshysy Qasym-Jomart Toqaev óziniń alǵashqy halyqqa arnaǵan joldaýynda shaǵyn jáne mikro biznesti salyqtan bosatýǵa tapsyrma bergen bolatyn.
"Úkimetke mikro jáne shaǵyn biznesti úsh jylǵa tabys salyǵynan bosatý týraly zań jobasyn ázirleýdi tapsyramyn", - dedi Toqaev halyqqa arnaǵan Joldaýynda.
Tiisti normativtik ózgerister 2020 jyldan kúshine enýi tiis. Budan bólek, kelesi jyly qańtar aiynan bastap mikro jáne shaǵyn biznesti tekserýge úsh jylǵa tyiym salynady.
