Jyl sońyna deiin 4 telearna arqyly 11 tarihi serial kórermenge jol tartady. Bul týraly QR Aqparat jáne qoǵamdyq damý ministri Aida Balaeva Kazmedia ortalyǵynda ótken tarihi serialdardyń tanystyrylymynda aitty, dep habarlaidy QazAqparat.
«Túsirilip jatqan serialdarǵa taǵdyry arqaý bolǵan tulǵalardyń báriniń de armany - eldi táýelsizdikke jetkizý edi. Osy jolda bastaryn báigege tikti. Sondyqtan ult maqtanyshtarynyń ónegeli ómir jolyn kórsetý arqyly biz jas urpaqtyń rýhyn kóterip, táýelsizdigimizdiń qunyn uǵyndyra alamyz. Prezident tapsyrmasyn oryndaý aiasynda ulttyq arna osy sharany uiymdastyryp otyr. Telearna basshylyǵyna, Lázzat Muratqyzy men ujymǵa alǵys aitamyz», - dedi vedomstvo basshysy.
Sondai-aq, ol memlekettik telearnalar usynatyn kontenttiń 30 paiyzy tarih taqyrybyna arnalyp otyrǵanyn málim etti.
«Búginde tarihi jobalar memlekettik telearnalar usynatyn ónimniń 30 paiyzyn quraidy. Jyl sońyna deiin tarihi baǵyttaǵy 11 serial kórermen nazaryna usynylady. Atap aitsaq, ulttyq arnada «Domalaq ana», «Jáńgir han. Sarai syry», «Domalaq ana», «Qanysh. Qazyna», «Táshenev. Taitalas», «Ahmet. Ult ustazy» hikaialary, «Habar» arnasynda «Bulbul ánshi Roza Baǵlanova», 31-arnada «Jambyl Jabaev», Almaty arnasynda «Turar Rysqulov» serialdary kórsetiledi. Bulardyń bári kórermen kóńilinen shyǵyp, joǵary baǵa alady dep senemin. Bul týyndylardyń tanystyrylymyn jyldaǵydai jabyq formatta da ótkizýge bolatyn edi. Dese de, tarihi serialdardyń mańyzyn eskere otyryp, arnaiy shara uiymdastyrdyq», - dep túiindedi Aida Balaeva.
