Shymkentte ánshi Qairat Nurtastyń kontserti kezinde bolǵan adamdardyń qysylyp qalý oqiǵasyna bailanysty uiymdastyrýshy ustaldy. Oǵan qatysty qylmystyq is boiynsha tergeý júrgizilip jatyr, dep habarlaidy ult.kz.

Politsiianyń aldyn ala málimetinshe, kontsertke satylǵan biletter sany alańnyń belgilengen syiymdylyǵynan edáýir kóp bolǵan. Sonyń saldarynan kórermender shamadan tys jinalyp, adamdardyń qaýipsizdigine qater tóngen.

Oqiǵa kezinde 18 jastaǵy boijetken zardap shegip, aýrýhanaǵa jetkizilgen.

Quqyq qorǵaý organdary kontsertti uiymdastyrǵan 1984 jyly týǵan L. esimdi azamattyń ustalyp, ýaqytsha ustaý izoliatoryna qamalǵanyn málimdedi.

Sonymen qatar politsiia áleýmettik jelilerde taraǵan adam ólimi týraly aqparatty joqqa shyǵardy. Resmi málimet boiynsha, oqiǵa saldarynan qaza tapqandar joq.

Qazirgi ýaqytta oqiǵanyń barlyq mán-jaiyn anyqtaý úshin tergeý amaldary júrgizilip jatyr. Qylmystyq istiń barysy Shymkent qalasy politsiia departamenti basshylyǵynyń baqylaýyna alynǵan.

Aita keteiik, Qairat Nurtastyń Shymkenttegi kontsertinen keiin qylmystyq is tirkeldi.

Qairat Nurtas kim?

Qairat Nurtas – qazaqstandyq tanymal estrada ánshisi, akter ári prodiýser. Ol 1989 jyly 25 aqpanda Túrkistan qalasynda dúniege kelgen.

Óner jolyn jas kezinen bastaǵan ánshi “Arman”, “Aýyrmaidy júrek”, “Shyda júrek”, “Almaty túni” jáne basqa da ánderi arqyly kópshilikke tanyldy. Onyń shyǵarmashylyǵynda mahabbat, saǵynysh jáne otbasy taqyryptary keńinen oryn alǵan.

Qairat Nurtas ánshilikpen qatar kino salasynda da ózin tanytyp, “Ókinish” jáne “Arman” filmderine túsken. Anasy Gúlzira Aidarbekova uzaq jyldar boiy onyń prodiýseri bolyp keledi.

2008 jyly Almatydaǵy Respýblika saraiynda alǵashqy jeke kontsertin ótkizgen. Sodan beri qazaq estradasyndaǵy tanymal oryndaýshylardyń birine ainaldy.