Keshe Atyraý qalasynda Memleket basshysynyń qatysýymen álemdegi eń iri ken oryndarynyń biri jáne Qazaqstandaǵy birinshi teńiz ken orny bolyp tabylatyn Qashaǵannyń resmi tanystyrylymy boldy, - dep habarlaidy "Ult aqparat".
Eske sala keteiik, 2016 jyldyń 1 qarashasynda Qashaǵanda óndirý táýligine 75 myńnan astam barrel munai kommertsiialyq deńgeige jetti. Qazirgi tańda óndirý deńgeiin arttyrý jáne ony táýligine 180 myń barrel deńgeiinde turaqtandyrý maqsatynda jumystar júrgizilýde.
«Biylǵy jyldyń sońyna deiin 1 mln tonna-ǵa deiin munai jáne 680 mln tekshe metrge jýyq gaz, 2017 jyly – 8,9 mln tonna munai jáne 5,6 mlrd tekshe metr gaz óndirý josparlanýda. Kelesi jyldary jylyna 13 mln tonnaǵa deiin munai jáne 9 mlrd tekshe metr gazǵa deiin óndirýdi arttyrý josparlanýda», - dep málimdelgen habarlamada.
Qashaǵandy igerýdiń nátijesinde álemdik standarttarǵa sai keletin otandyq teńiz servistik infraqurylymy salyndy:
- «Ersai» (Quryq p.) jáne «Kaspian Offshor Marin Konstrakshn» (Aqtaý teńiz porty) aýyr tonnaly metall qurastyrylymyn shyǵarý boiynsha zaýyttar salyndy; Baýtin portynda keme jóndeitin zaýyt salyndy;
- teńiz operatsiialaryn qoldaý bazasy (Baýtin porty), munai tógilýine den qoiý bazasy jáne ózge de nysandar quryldy.
Energetika ministrliginiń habarlaýynsha, Shliýmberje, Simens, Enerdji Výd Grýpp, Saipem sekildi halyqaralyq kompaniialar óz bilimderi, tehnologiialary jáne tájiribelerimen kirgen 70-ke jýyq birlesken kompaniialar/ áriptestikter quryldy.
Qazirgi kezde Qashaǵan jobasynda Qazaqstan ieligindegi úlesi 50%-dan astam 274 kompaniia jumys jasaidy.
180-nen astam qazaqstandyq kompaniia oqýdan ótip, halyqaralyq standarttar boiynsha sertifikattaldy.
Áleýmettik jaýapkershilik aiasynda konsortsiým Mańǵystaý jáne Atyraý oblystarynyń áleýmettik jáne infraqurylymdyq damýyna 500 mln dollardan astam qarajat bóldi.
Osy jyldar ishinde: 49 bilim berý mekemesi (mektepter, balabaqshalar), 30 meditsinalyq mekeme (aýrýhanalar, emhanalar, aýyldyq dárigerlik pýnktiler), 68 infraqurylym nysany (qalalar men aýyldardy gazdandyrý, joldar salý), 8 mádeni nysan (klýbtar, mádeniet úileri), 12 sport nysany (stadiondar, dene shynyqtyrý-saýyqtyrý keshenderi) salyndy.
.jpeg)