Bilim jáne ǵylym ministri Ashat Aimaǵambetov mektepterge oqýlyq jetkizýge qatysty jyl saiyn qaitalanatyn problemany sheshpek, dep habarlaidy QazAqparat.
«Jyl saiyn bizde oqýlyqtardy jetkizý (mektepterge) boiynsha problema týyndaidy. Sol sebepti osy jyldyń 31 naýryzyna deiin oqýlyqtardy jetkizý boiynsha memlekettik satyp alý jumysyn aiaqtaýdy tapsyramyn. Ádettegidei, shilde nemese tamyz ailaryna deiin kútýdiń qajeti joq. Olai etsek, jyl saiyn osy problemamen betpe-bet kele beremiz. Bul jumysty 31 naýryzǵa deiin atqarýǵa eshteńe kedergi keltirip turǵan joq», - dedi Ashat Aimaǵambetov Bilim jáne ǵylym ministrliginiń apparat otyrysynda.
Ministr bul baǵyttaǵy jumysty baqylaýdy óziniń orynbasary Sholpan Qarinovaǵa tapsyryp, qarjylandyrý jáne memlekettik satyp alý josparyna ózgeris engizýdi, artynsha tiisti konkýrsty ótkizýdi tapsyrdy.
«Jetkizý boiynsha problema jyl saiyn qaitalanady», - dedi ol.
Vedomstvo basshysy sonymen qatar kontingenttiń ózgerip bara jatqanyn esepke alýdy eskertti.
«2019 jyly birinshi synypqa kelgen balalardyń sany 2018 jyly kelgenderden kóp. Kelesi jyl olardyń sany odan da kóp bolmaq. Tiisinshe birinshi synypqa qajetti oqýlyqtarǵa tiisti qarajatty aldyn ala qarastyrýymyz kerek. Bala týý kórsetkishi joǵary. Sol sebepti aldymen kontingentti anyqtap alǵan abzal», - dedi ol.
