Foto: ashyq derekkóz
Úkimet otyrysynda QR Ulttyq bankiniń tóraǵasy Timýr Súleimenov ulttyq valiýtanyń aǵymdaǵy baǵamyna túsinikteme berdi, dep habarlaidy Ult.kz.
Ol jyl basynan beri teńge baǵamy bir AQSh dollary úshin 512,57 teńgege deiin, iaǵni 2,4%-ǵa nyǵaiǵanyn atap ótti.
«Baǵamnyń aǵymdaǵy dinamikasy negizinen júrgizilip jatqan dezinfliatsiialyq saiasat sheńberindegi ortasha qatań aqsha-nesie sharttaryna bailanysty. Bul teńgelik aktivterdiń tartymdylyǵyn sheteldik investorlar arasynda da arttyra tústi. Osylaisha, rezident emes tulǵalardyń QR memlekettik baǵaly qaǵazdarǵa (MBQ) salǵan portfeldik investitsiialarynyń kólemi jyl basynan qarasha aiyna deiin shamamen 750 mlrd teńgege, al qarasha aiynda 340 mlrd teńgege ulǵaidy», — dedi Timýr Súleimenov.
Onyń aitýynsha, ulttyq valiýta baǵamyn qoldaý Ulttyq banktiń shetel valiýtasyn satýy esebinen de qamtamasyz etilýde. 2025 jyldyń basynan qarasha aiyna deiin Ulttyq qordan biýdjettik transfertter sheńberinde $7,8 mlrd satyldy, bul rette sonyń ornyn toltyrý maqsatynda altyn satyp alý jónindegi operatsiialar kólemi $6,1 mlrd-ty qurady.
Sondai-aq Timýr Súleimenov Halyqaralyq jalpy rezervter osy jyldyń qarasha aiynyń sońynda $125,7 mlrd qurap, jyl basynan beri 20,1%-ǵa óskenin málimdedi.
Ol Ulttyq banktiń altyn-valiýta rezervteri 35,5%-ǵa ulǵaiyp, $62,1 mlrd, Ulttyq qordyń aktivteri 8,1%-ǵa ulǵaiyp, $63,6 mlrd bolǵanyn atap ótti.
«Qorǵa túsetin túsimder somasy jyl basynan beri 3,6 trln teńgeni, al Ulttyq qordan respýblikalyq biýdjetke beriletin transfertter kólemi 4,9 trln teńgeni qurady. Osy jyldyń 11 aiynda Ulttyq qordyń investitsiialyq kirisi 13,7%-dy nemese $8,2 mlrd-ty qurady», — dedi Timýr Súleimenov.
