فوتو: اشىق دەرەككٶز
ٷكٸمەت وتىرىسىندا قر ۇلتتىق بانكٸنٸڭ تٶراعاسى تيمۋر سٷلەيمەنوۆ ۇلتتىق ۆاليۋتانىڭ اعىمداعى باعامىنا تٷسٸنٸكتەمە بەردٸ, دەپ حابارلايدى Ult.kz.
ول جىل باسىنان بەرٸ تەڭگە باعامى بٸر اقش دوللارى ٷشٸن 512,57 تەڭگەگە دەيٸن, ياعني 2,4%-عا نىعايعانىن اتاپ ٶتتٸ.
«باعامنىڭ اعىمداعى ديناميكاسى نەگٸزٸنەن جٷرگٸزٸلٸپ جاتقان دەزينفلياتسييالىق ساياسات شەڭبەرٸندەگٸ ورتاشا قاتاڭ اقشا-نەسيە شارتتارىنا بايلانىستى. بۇل تەڭگەلٸك اكتيۆتەردٸڭ تارتىمدىلىعىن شەتەلدٸك ينۆەستورلار اراسىندا دا ارتتىرا تٷستٸ. وسىلايشا, رەزيدەنت ەمەس تۇلعالاردىڭ قر مەملەكەتتٸك باعالى قاعازدارعا (مبق) سالعان پورتفەلدٸك ينۆەستيتسييالارىنىڭ كٶلەمٸ جىل باسىنان قاراشا ايىنا دەيٸن شامامەن 750 ملرد تەڭگەگە, ال قاراشا ايىندا 340 ملرد تەڭگەگە ۇلعايدى», — دەدٸ تيمۋر سٷلەيمەنوۆ.
ونىڭ ايتۋىنشا, ۇلتتىق ۆاليۋتا باعامىن قولداۋ ۇلتتىق بانكتٸڭ شەتەل ۆاليۋتاسىن ساتۋى ەسەبٸنەن دە قامتاماسىز ەتٸلۋدە. 2025 جىلدىڭ باسىنان قاراشا ايىنا دەيٸن ۇلتتىق قوردان بيۋدجەتتٸك ترانسفەرتتەر شەڭبەرٸندە $7,8 ملرد ساتىلدى, بۇل رەتتە سونىڭ ورنىن تولتىرۋ ماقساتىندا التىن ساتىپ الۋ جٶنٸندەگٸ وپەراتسييالار كٶلەمٸ $6,1 ملرد-تى قۇرادى.
سونداي-اق تيمۋر سٷلەيمەنوۆ حالىقارالىق جالپى رەزەرۆتەر وسى جىلدىڭ قاراشا ايىنىڭ سوڭىندا $125,7 ملرد قۇراپ, جىل باسىنان بەرٸ 20,1%-عا ٶسكەنٸن مەلٸمدەدٸ.
ول ۇلتتىق بانكتٸڭ التىن-ۆاليۋتا رەزەرۆتەرٸ 35,5%-عا ۇلعايىپ, $62,1 ملرد, ۇلتتىق قوردىڭ اكتيۆتەرٸ 8,1%-عا ۇلعايىپ, $63,6 ملرد بولعانىن اتاپ ٶتتٸ.
«قورعا تٷسەتٸن تٷسٸمدەر سوماسى جىل باسىنان بەرٸ 3,6 ترلن تەڭگەنٸ, ال ۇلتتىق قوردان رەسپۋبليكالىق بيۋدجەتكە بەرٸلەتٸن ترانسفەرتتەر كٶلەمٸ 4,9 ترلن تەڭگەنٸ قۇرادى. وسى جىلدىڭ 11 ايىندا ۇلتتىق قوردىڭ ينۆەستيتسييالىق كٸرٸسٸ 13,7%-دى نەمەسە $8,2 ملرد-تى قۇرادى», — دەدٸ تيمۋر سٷلەيمەنوۆ.
